Исроил ҳарбий-ҳаво кучларига тегишли қирувчи самолётлар Ливаннинг Литани дарёси шимолида жойлашган бешта ҳудудга аниқ зарбалар берди. Расмий маълумотларга кўра, бу ерда “Ҳизбуллоҳ” ҳаракатига мансуб, гумон қилинган ҳарбий нуқталар ва инфратузилмалар мавжуд бўлган. Ҳужумлар маҳаллий аҳолида кескин хавотир уйғотган.
Маҳаллий фуқаро муҳофазаси хизмати “X” ижтимоий тармоғида тарқатган хабарда айтилишича, ҳаво зарбалари Бургуз, Жаббур, Жермак, Эл-Қатрания ва Эл-Маҳмудия қишлоқлари яқинида амалга оширилган. Аҳоли пунктлари четида шиa жангарилари ҳаракатланаётгани кузатилгани ва шу боис ушбу ҳудудлар асосий нишонга айлангани маълум қилинган.
Гувоҳлар сўзларига кўра, портлашлар ва ҳаводан зарбалар туфайли айрим уйлар ва хўжалик биноларига моддий зарар етган. Ҳозирги вақтда зарар кўрган ҳудудларда қутқарув хизматлари ва тиббий ёрдам гуруҳлари фаолият олиб бормоқда. Маҳаллий аҳоли хавфсиз жойларга кўчирилаётгани хабар қилинди.
Исроил ҳарбийлари эса ушбу зарбаларни чегара хавфсизлигини таъминлаш ва “террорчилик инфратузилмаси”ни йўқ қилиш мақсадида амалга оширганини маълум қилди. Шу билан бирга, Ливан расмийлари ушбу ҳаракатни мамлакат ҳудудий яхлитлигига таҳдид сифатида баҳолади. Халқаро ташкилотлар эса зиддиятнинг кучайишига йўл қўймасликка чақирмоқда.
«Замин»ни Telegram’да ўқинг!
