Россия Федерацияси ҳудудида коронавируснинг мутлақо янги тури — ХФГ “Стратус” штамми аниқлангани ҳақида расмий маълумот берилди. Роспотребнадзор тарқатган ахборотга кўра, мамлакат бўйлаб бу штамм билан касалланишнинг 114 та ҳолати қайд этилган.
Маълум қилинишича, аниқланган ҳолатларнинг 54 фоизи мамлакат пойтахти Москва шаҳрига тўғри келмоқда. Қолган ҳолатлар эса асосан Магадан, Свердловск ва Ленинград вилоятларида рўйхатга олингани таъкидланди.
Эслатиб ўтамиз, дунёда мазкур штамм илк бор 2025 йил 27 январь куни Канада ҳудудида қайд этилган. Россияда эса биринчи ҳолат шу йилнинг 24 апрель куни аниқланган ва расмий рўйхатга киритилган.
Мутасадди идора вакилларининг таъкидлашича, янги штамм юқумлилиги юқори бўлиб, тез суръатда тарқалиши мумкин. Бироқ, у оғир кечмасдан, асосан енгил шаклда намоён бўлади. Шифокорларнинг қайд этишича, вируснинг асосий белгилари овознинг бўғиқлиги ҳамда оммавий равишда кузатилган енгил симптомлардир. Улар ўтган даврда кенг тарқалган “омикрон” штаммига жуда ўхшашлиги билан ажралиб туради.
Эпидемиологлар аҳолига ҳушёрликни йўқотмасликни, профилактика қоидаларига амал қилишни ва зарурат бўлса тиббий кўрикдан ўтишни тавсия қилмоқда.
Мутасаддиларнинг фикрича, бу штамм катта хавф туғдирмасада, унинг кенг миқёсда тарқалишининг олдини олиш муҳим аҳамиятга эга.
«Замин»ни Telegram’да ўқинг!
