Хитойда профессионал киберспортчиларни тайёрлаш билан шуғулланувчи клуб ўйин қарамлигидан азият чекаётган ёшларга ёрдам бериш учун ўзига хос дастур ишга туширди, деб ёзади China Morning Post.
Hebey провинциясида 2018 йилда ташкил этилган клуб эгаси Су Ченхао дастлаб спортчиларни чемпионликка етаклашни мақсад қилган. Аммо тез орада у кибер ўйинларда фақат оз сонли одамгина юқори натижаларга эриша олишини тушунди. Кўпчилик эса ўйин орқали ўқиш ёки ҳаётдаги муаммолардан қочишга уринарди.
Клуб орқали ҳозиргача 4000 га яқин бола ўтган, уларнинг 85 фоизи онлайн ўйинларга қаттиқ берилиб кетгани аниқланган. Бу эса уларнинг кундалик ҳаёти ва таълимига жиддий салбий таъсир кўрсатган. Су: “Бу ерда муҳит шунчалик босимли бўладики, ўқишдан кўра ўйин оғирроқ туюлади”, дея таъкидлайди. Шу сабабдан у махсус “ўйиндан воз кечиш” курсини жорий этди.
Терапия дастурининг нархи танланган муддатга қараб фарқланади: бир ҳафталик курс бир неча юз доллар, 22 кунлик даволаш эса 1400 доллар атрофида.
Машғулотлар оддий тартибда ўтади: қатнашчилар эрталаб соат тўққиздан тунггача компьютерда ўйнайди, фақатгина тушлик ва югуриш учун танаффус берилади. Су айтишича, киберкарера қилишни истаганлардан бири илк кунданоқ талваса тутган, бошқа бир бола эса иккинчи куни йиғлаб уйига қайтиб кетган.
Шу ўринда таъкидлаш жоизки, бундай марказлар Хитойда кенг тарқалган. Масалан, Sichuan провинциясидаги киберспорт клуби сўнгги 8 йил ичида 700 нафар ўқувчини қабул қилган, бироқ уларнинг атиги 3 нафари профессионал даражага кўтарила олган. Мутахассислар ҳисоб-китобларига кўра, кибер ўйинчи бўлиб танилиш эҳтимоли 120 мингдан бирни ташкил этади.
«Замин»ни Telegram’да ўқинг!
