Шимолий Корея раҳбари Ким Чен Ин Пхенян умумий шифохонаси қурилаётган майдонга ташриф буюриб, амалга оширилаётган ишлар билан шахсан танишди. Бу ҳақда мамлакатнинг Корея марказий ахборот агентлиги хабар тарқатди.
Маълум қилинишича, шифохона қурилиши бир ярим йилдан буён чўзилаётгани мамлакат етакчисининг қаттиқ норозилигига сабаб бўлди. Ким Чен Иннинг сўзларига кўра, бундай ҳолатга айрим юқори лавозимли амалдорларнинг шахсий манфаат ва ортиқча даъволари, шунингдек, Вазирлар Маҳкамаси ва қўшма қурилиш штабининг нотўғри ташкилий ишлари сабабчи бўлган.
Унинг таъкидлашича, масъул шахслар давлат молиявий интизомини мутлақо эътиборга олмаган ва бюджет расман тасдиқланмасдан туриб, ўзбошимчалик билан қурилиш ишларини бошлаб юборган. Бу эса нафақат катта моддий йўқотишларга, балки лойиҳанинг белгиланган муддатда якунланмаслигига ҳам олиб келган. Ким Чен Ин уларни интизомсизлик ва сиёсий етукликнинг йўқлигида айблади.
Шу билан бирга, Шимолий Корея етакчиси бажарилган ишлар сифати ҳақида ҳам ўз фикрини билдириб ўтди. У, айниқса, шифохонанинг ўзига хос меъморий ечимлари ва функционал жиҳатларини юқори баҳолаб, улар мамлакат соғлиқни сақлаш тизими учун катта қадам бўлишини таъкидлади.
Ким Чен Иннинг бу ташрифи яна бир бор Шимолий Кореяда давлат назорати ва интизом масаласи қай даражада муҳим аҳамият касб этишини намоён қилди.
«Замин»ни Telegram’да ўқинг!
