Хитойда янги вирус тарқалди: 3000 дан ортиқ киши бу вирусни юқтириб олди

Гуандунда чикунгуня вируси тез ёйилмоқда, вакцина ҳали йўқ.

Хитойнинг жанубидаги Гуандун провинциясида шифокорлар чикунгуня вирусининг кескин тарқалишини қайд этди. 28 сентябрдан 4 октябргача бўлган муддатда 3181 нафар инсонда инфекция аниқланган, деб хабар берди Касалликларни назорат қилиш ва профилактика маркази.

Беморлар сони ҳафта сайин ортиб бормоқда — 21–27 сентябрь кунлари 3153 та, 14–20 сентябрда эса 2426 та ҳолат қайд этилган. Муттахассислар вируснинг асосий тарқатувчилари бўлган Aedes aegypti ва Aedes albopictus чивинлари кўпайиб кетганини билдиришмоқда.

Кучли ёмғирлар ва тайфунлар туфайли чивинлар учун қулай муҳит яратилган, бу эса касаллик тарқалишини кучайтирган. Ҳозирча чикунгуняга қарши самарали вакцина ёки даво мавжуд эмас.

Инфекциянинг инкубация даври 3–12 кун бўлиб, беморларда иситма, титроқ, бўғим оғриқлари ва терида тошмалар кузатилади. Шифокорлар аҳолини эҳтиёт чораларига риоя қилишга чақирмоқда.

Aziza Shukhratova

«ZAMIN.UZ» муҳаррири