Туркия пойтахти Анқарада жойлашган Этимесгут ҳарбий аэродроми яқин орада мамлакат етакчилари ва хорижий делегациялар учун мўлжалланган махсус VIP аэропортга айлантирилмоқда, деб хабар берди Sözcü нашри.
Маълумотларга кўра, аэропортни қайта қуриш лойиҳаси жуда кенг кўламли бўлиб, у замонавий халқаро талабларга жавоб берадиган даражада бўлади. Учиш-қўниш йўлаги 3000 метргача узайтирилади, кенглиги эса 60 метрга етказилади. Шу билан бирга, бир вақтнинг ўзида 50 та самолётни қабул қила оладиган икки катта перрон қурилиши кўзда тутилган.
Аэропорт асосан президентлар, бош вазирлар ва юқори даражали меҳмонлар ташрифлари учун хизмат қилади. Бу ерда Фахрийлар зали ва 2400 квадрат метрлик Давлат меҳмон уйи қурилаётган бўлиб, у махсус расмий делегациялар ва халқаро саммитлар учун мўлжалланган.
Объект бошқаруви Туркия аэропортлари давлат бошқармасига топширилади, бироқ мулк ҳуқуқи Бош штабда сақланиб қолади. Қайта қуриш ишлари 2026 йил июль ойига қадар якунланиши режалаштирилган. Шу сана Туркия тарихидаги муҳим воқеа — Türkkuşu Planör мактабининг очилганига 100 йил тўлишига тўғри келади. Ушбу мактаб очилишида ўтган асрда Мустафо Камол Отатурк шахсан иштирок этган эди.
Этимесгут аэродроми тарихан Туркия ҳарбий-ҳаво кучларининг асосий базаларидан бири бўлган, шунингдек, ўқув ва логистика маркази вазифасини бажариб келган. Энди у деярли бир асрдан сўнг яна стратегик аҳамият касб этаётгани билан аҳамиятли. Янги VIP аэропорт Туркия пойтахтининг дипломатик ва протокол салоҳиятини янада мустаҳкамлаши, мамлакатни халқаро миқёсдаги муҳим сиёсий марказлардан бирига айлантириши кутилмоқда.
“Zamin”ни Telegram'да ўқинг!
