Шимолий Корея ва Америка Қўшма Штатлари ўртасидаги сиёсий кескинлик яна авж олди. Пхеньян расмийлари Вашингтон томонидан жорий этилган навбатдаги санкцияларга қаттиқ баёнот билан жавоб берди. Бу ҳақда мамлакатнинг марказий ахборот агентлиги маълум қилди.
Баёнотда таъкидланишича, АҚШнинг босим, таҳдид ва алдамчилик орқали натижага эришиш сиёсати Корея Халқ Демократик Республикаси (КХДР) учун ҳеч қандай таъсир кучига эга эмас.
“АҚШнинг санкцияси бизнинг фикрлаш тарзимизга ҳам, мамлакатимиз сиёсий позициясига ҳам таъсир қилмайди. Бу – Вашингтоннинг КХДРга нисбатан барбод бўлган сиёсатидан навбатдаги исбот, холос”, — дейилади Шимолий Корея ташқи ишлар вазири ўринбосари Ким Ин Чхорнинг баёнотида.
Пхеньян шунингдек, санкциялар орқали таъсир кўрсатишни “аҳмоқона уриниш” деб атади ва АҚШнинг “душманона позицияси”га муносиб жавоб беришини маълум қилди.
Шимолий Кореянинг фикрича, Вашингтон қўллаётган босим сиёсати фақат зиддиятни кучайтиради ва ҳеч қандай дипломатик натижа бермайди.
Маълумот учун, жорий йил 4 ноябрь куни АҚШ Молия вазирлиги кибержиноятчилик ва ахборот технологияларидан фойдаланган ҳолда маблағларни ноқонуний ўзлаштиришда айбланаётган саккиз нафар шимолий кореялик фуқаро ва иккита юридик шахсга нисбатан санкция жорий этган эди.
Бу фаолият илгари ҳам Пхеньян учун асосий айбловлардан бири бўлиб келган. АҚШ вакилларининг маълумотларига кўра, шимолий кореялик ҳакерлар 2017 йилдан буён киберҳужумлар орқали уч миллиард доллардан ортиқ криптовалютани ўғирлашга муваффақ бўлган. Бундай ҳужумлар КХДР разведкаси билан боғлиқ махсус гуруҳлар томонидан амалга оширилаётгани таъкидланади.
Шимолий Корея ва АҚШ муносабатлари 2018–2019 йилларда Ким Чен Ин ва Доналд Трампнинг учта учрашувидан кейин анча совуқлашган. Ҳар икки томон ҳам ўша пайтда дипломатик йўл билан музокаралар давом этишини билдирган бўлса-да, кейинчалик Пхеньян мулоқотни рад этган эди.
Жорий йил Трамп Осиё сафари давомида Ким Чен Ин билан яна учрашиш ниятини билдирган, аммо бу режа амалга ошмаган. Сентябрь ойида эса шимолий кореялик етакчи АҚШни “Пхеньяндан ядровий дастурдан воз кечишни талаб қилмасликка” чақирган.
Шу орада, Шимолий Кореянинг Россия билан ҳарбий ҳамкорлиги ҳақидаги маълумотлар ҳам ортиб бормоқда. Халқаро таҳлилчиларнинг таъкидлашича, Пхеньян Украинадаги урушда Москвага ҳарбий куч билан ёрдам бермоқда. Жанубий Корея миллий разведка хизмати маълумотларига кўра, Россия–Украина чегараси яқинида тахминан 10 минг шимолий кореялик ҳарбийлар жойлаштирилган, шунингдек, яқинда яна 5 минг ҳарбий юборилгани ҳақида хабарлар тарқалди.
Ким Чен Ин маъмурияти Вашингтоннинг санкция босими орқали сиёсий устунликка эришиш уринишини рад этар экан, халқаро майдонда яна бир бор ўзининг мустақил сиёсий йўлини таъкидлаб қўйди.
“Zamin”ни Telegram'да ўқинг!
