Эквадор футболи яна бир оғир фожеани бошдан кечирмоқда. Эквадорнинг машҳур клубларидан бири — Барселона футболчиси Марио Пинейданинг ўлдирилиши бўйича терговда илк жиддий натижалар қайд этилди. Мазкур жиноятда гумон қилинаётган икки нафар шахс мамлакат ҳуқуқ-тартибот идоралари томонидан қўлга олинди.
Бу ҳақда The Independent нашри хабар тарқатди. Футболчининг вафоти ҳақида чоршанба куни маълум бўлган эди ва ушбу воқеа бутун мамлакатда катта резонанс уйғотди.
ОАВ тарқатган дастлабки маълумотларга кўра, мотоциклда ҳаракатланган икки нафар номаълум шахс дўкондан чиқиб кетаётган пайтда Пинейдага, унинг рафиқаси ҳамда онасига ўқ узган. Афсуски, футболчи ва унинг турмуш ўртоғи воқеа жойидаёқ ҳалок бўлган. Онасининг аҳволи эса оғир бўлиб, у зудлик билан шифохонага ётқизилган. Фожеа мамлакатнинг йирик шаҳарларидан бири — "Гуаякиль"да содир бўлган.
Эквадор прокуратураси икки нафар гумонланувчининг ҳибсга олинганини расман тасдиқлади. Маҳаллий судья фикрича, уларга қарши етарли далиллар йиғилган. Шу билан бирга, тергов жараёнида гумонланувчилар жазодан қочиш йўлларини излаётгани ҳам қайд этилмоқда. Маълум бўлишича, улардан бири видеокузатув камералари ёрдамида мотоцикл ҳаракатини таҳлил қилиш орқали аниқланган.
Маълумот учун, Марио Пинейда Эквадор миллий терма жамоаси сафида саккизта учрашувда майдонга тушиб, битта голли узатма муаллифи бўлган. Клуб даражасида эса у Эл-Насиональ, Флуминенсе ва Индепендьенте дель Валье жамоаларида ҳам тўп суриб, ўз номини мухлислар хотирасида қолдирган.
Бу қотиллик Эквадор футболида хавфсизлик масаласи янада жиддий кўриб чиқилиши кераклигини кўрсатди. Футбол жамоатчилиги эса адолат қарор топишига умид қилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
