Қирғизистон Миллий хавфсизлик давлат қўмитасининг собиқ раиси Қамчибек Ташиев лавозимидан озод этилгани бўйича ўз мурожаатини эълон қилди. У бу қарорни ўзи учун “кутилмаган ҳолат” деб атаб, воқеага муносабат билдирди.
Ташиевнинг айтишича, у тиббий амалиётдан кейин президент рухсати билан хорижга — текширув ва даволаниш жараёнлари учун чиққан. Шунга қарамай, лавозимдан бўшатиш ҳақидаги қарор у учун кутилмаган бўлганини таъкидлади.
Мурожаатда у ўзини қатъий тутиб, ҳар қандай вазиятда ҳам давлат раҳбарининг қарорини бажариш кераклигини алоҳида урғулаган. Шу билан бирга, у давлатга, халққа ва президентга ҳалол хизмат қилганини айтиб, бу йўлдан фахрланишини билдирган.
Энг кўп алам қилган нуқта сифатида эса Ташиев шахсий таркиб билан хайрлашиш имконияти берилмаганини қайд этди. У МХДҚ тизимида хизмат қилаётган ҳар бир ходимга миннатдорчилик изҳор этиб, уларга ишида омад ва муваффақият тилади.
"Давлатимизга, халқимизга, президентимизга ҳалол хизмат қилдим ва бу билан фахрланаман. Фақат бир нарсадан афсусдаман, менга шахсий таркиб билан хайрлашиш имконияти берилмади. Миллий хавфсизлик давлат қўмитасининг ҳар бир ходимига миннатдорлик билдираман ва муваффақиятлар тилайман!" — дейилади мурожаатда.
Мурожаатнинг якунида эса собиқ раҳбар фуқароларга мурожаат қилиб, қонунга амал қилиш, ноқонуний хатти-ҳаракатлардан тийилиш ва жамиятда тинчлик ҳамда барқарорликни асраш муҳим эканини эслатди. Қисқаси, у кетар экан, ортидан “шовқин” эмас — тартиб, хотиржамлик ва масъулият қолишини истаган.
Бу баёнот ҳозирги вазиятда жамоатчилик учун бир сигнал: сиёсий муҳит қай тарзда ўзгармасин, мамлакат ичидаги осойишталик энг катта қиммат бўлиб қолаверади.
“Zamin”ни Telegram'да ўқинг!
