Фото: Olena Znak/Anadolu/picture alliance
Украина президенти Володимир Зеленский Лвив марказида содир этилган ва инсон ўлимига сабаб бўлган террорчилик ҳаракатида Россия махсус хизматларини айблади. 22 февралга ўтар кечаси юз берган портлашлар оқибатида ёш полиция ходими ҳалок бўлди, ўнлаб фуқаролар жароҳатланди.
Telegram орқали ёлланган "қотил аёл"
Зеленскийнинг таъкидлашича, жиноят ижрочилари айнан Telegram тармоғи орқали топилган. Терактни содир этишда гумонланиб, Ровно вилоятида яшовчи 33 ёшли аёл қўлга олинди. Тергов маълумотларига кўра, у Лвив марказидаги бино ёнига иккита қўлбола портловчи қурилма ўрнатган.
Жиноятчилар ўта айёрлик билан иш тутган: аввал полицияга ёлғон қўнғироқ қилиб, бинога ўғри тушгани ҳақида хабар беришган. Тартиб посбонлари воқеа жойига етиб келганида эса портлашлар масофадан туриб амалга оширилган. Ушбу мудҳиш режа қурбони бўлган полициячи бор-йўғи 23 ёшда эди.
Шифохоналардаги вазият ва қўлга олиш
Лвив мэри Андрей Садовийнинг сўзларига кўра, портлаш натижасида жами 25 киши жароҳатланган, улардан икки нафарининг аҳволи ҳозирда ўта оғир деб баҳоланмоқда. Жиноятда гумонланаётган аёл чегара яқинидаги Старий Самбор шаҳрида қўлга тушган. Унинг уйидан айбдорлигини тасдиқловчи қатор далиллар топилган.
Telegram тақиқланадими?
Ушбу воқеа фонида Украина президенти офиси вакили Ирина Верешчук кескин баёнот билан чиқди. У Telegram ва шунга ўхшаш аноним платформалар душман томонидан террорчиларни ёллаш ва мувофиқлаштириш учун тизимли воситага айланганини айтди.
"Агар халқимиз ҳаётини сақлаб қолиш учун ушбу платформалар имкониятларини чеклаш керак бўлса, биз бу қадамга боришимиз шарт", — дея таъкидлади Верешчук.
Зеленский Украина разведкаси келгусида ҳам шу каби ҳужумлар уюштирилиши мумкинлиги ҳақида маълумотларга эга эканини билдириб, аҳолини ҳушёрликка чақирди.
Сизнингча, хавфсизлик нуқтаи назаридан ижтимоий тармоқлар ва мессенжерларни чеклаш қанчалик тўғри қарор?
“Zamin”ни Telegram'да ўқинг!
