АҚШ Россияни Яқин Шарқдаги ҳарбий объектлари ҳақидаги разведка маълумотларини бермасликка чақирди

АҚШ президентининг махсус вакили Стив Уиткофф Россияни Эронга Яқин Шарқдаги Америка ҳарбий объектлари ҳақидаги разведка маълумотларини бермасликка чақирди. У бу ҳақда президент Доналд Трамп самолёти бортида журналистлар билан суҳбат чоғида маълум қилган.

Уиткоффнинг айтишича, агар Москва Теҳронга қандайдир ёрдам кўрсатаётган бўлса ҳам, бу сезиларли натижа бермаётгани кўринмоқда. У сўнгги ҳафтадаги воқеаларни мисол қилиб келтириб, Эрон маълумот олаётган бўлса ҳам, бундан амалий фойда кўрмаётганини таъкидлаган.

Доналд Трамп эса Россиянинг можаро атрофидаги эҳтимолий ролига муносабат билдириб, АҚШ Эроннинг ҳарбий салоҳиятини аллақачон издан чиқарганини айтди. Унинг сўзларига кўра, Теҳронга узатилиши мумкин бўлган ҳар қандай ахборот ҳам энди катта аҳамият касб этмайди.

Аввалроқ CNN ўз манбаларига таяниб, Россия Эронга АҚШнинг Яқин Шарқдаги ҳарбий объектлари ҳақида маълумот бераётгани юзасидан хабар тарқатган эди. Айнан шу фонда Вашингтондан янграган баёнотлар Москва ва Теҳрон ўртасидаги эҳтимолий ҳамкорлик масаласини яна кун тартибига олиб чиқди.

Nigina Zarqarayeva

«ZAMIN.UZ» муҳаррири