АҚШ президенти Доналд Трамп Яқин Шарқдаги можаро ортидан нефть нархларининг кескин ошишига муносабат билдирди. У Truth Social ижтимоий тармоғидаги саҳифасида бу ҳолатни хавфсизлик ва тинчлик йўлидаги “жуда кичик тўлов” деб баҳолади.
Трампнинг ёзишича, Эроннинг ядровий таҳдиди бартараф этилгач, нефть нархларидаги бу қисқа муддатли ўсиш ҳам тез орада пасаяди. Унинг фикрича, юзага келган қимматлашув АҚШ ва бутун дунё хавфсизлиги билан солиштирганда катта масала эмас.
Reuters хабарига кўра, 9 март, душанба куни бозорлар очилиши билан Brent маркали нефть фьючерслари қарийб 20 фоизга ошиб, бир баррели 111,04 долларгача етган. Шу билан бирга, WTI маркали нефть нархи ҳам 16,8 фоизга кўтарилиб, 106,17 долларга чиққан. Таққослаш учун, 28 февралдан олдин нефтнинг бир баррели тахминан 70 доллар атрофида бўлган.
Таҳлилларга кўра, бозордаги асосий хавотир Ҳўрмуз бўғозининг узоқ муддатга тўсилиб қолиши эҳтимоли билан боғлиқ. Чунки одатий шароитда дунёдаги нефть ҳажмининг қарийб 20 фоизи айнан шу йўлак орқали ташилади. Бундан ташқари, Қатар суюлтирилган табиий газининг асосий қисми ҳам шу ҳудуд орқали ўтади.
Қайд этилишича, бу 2022 йил февралида Россиянинг Украинага кенг кўламли бостириб киришидан кейинги даврда кузатилган энг кескин нефть нархи ўсишларидан бири бўлди. Ўша пайтда ҳам жаҳон бозорида нефть нархи 100 доллардан анча юқорига кўтарилганди.
“Zamin”ни Telegram'да ўқинг!
