Бир ёшли боланинг оёғи ҳожатхона қувурига тиқилиб қолди

Қозоғистоннинг Олмаота вилояти Жамбил туманида ноодатий ҳодиса юз берди. Қарғали қишлоғида бир ёшли боланинг оёғи ҳожатхона конструкциясидаги металл қувурга қисилиб қолди.

Ҳодиса ҳақида “112” рақамига хабар берилгач, воқеа жойига Фавқулодда вазиятлар вазирлиги қутқарувчилари етиб келган. Боланинг оёғи қувур ичида қаттиқ қисилиб қолгани сабабли уни мустақил равишда чиқаришнинг имкони бўлмаган.

Қутқарувчилар болага зарар етказмаслик учун ишни ниҳоятда эҳтиёткорлик билан олиб борган. Махсус металл қайчилар ёрдамида қувур босқичма-босқич кесилиб, боланинг оёғи атрофидаги бўшлиқ кенгайтирилган.

Қутқарув операцияси бир соатдан ортиқ давом этган. Якунда бола қувурдан чиқариб олинган ва тиббий кўрик учун тез ёрдам бригадасига топширилган.

Ҳодиса болаларни қаровсиз қолдирмаслик ва маиший ҳудудларда уларнинг хавфсизлигини таъминлаш муҳимлигини яна бир бор кўрсатди.