Алкоголь ҳақида жамиятда турли қарашлар мавжуд: баъзилар “озгина ичиш фойдадан холи эмас”, деса, олимлар натижалар билан бу фикрни рад этишда давом этмоқда. “BMJ Evidence-Based Medicine” журналида чоп этилган янги тадқиқот шуни кўрсатдики, спиртли ичимликлар истеъмоли қандай миқдорда бўлишидан қатъи назар, деменция – яъни ақлий заифлик ва хотира муаммолари ривожланиши хавфини жиддий равишда оширади.
Таҳлилчиларнинг қайд этишича, инсон кўпроқ ичса, унинг руҳий ва неврологик касалликка чалиниш эҳтимоли ҳам шунчалик юқори бўлади. Бу ҳолат одамларда генетик мойиллик бор-йўқлигига боғлиқ эмас, яъни ақлий заифликка табиатан мойил бўлмаган шахс ҳам ортиқча ичимликдан жабр кўриши мумкин.
Кембриж университети тадқиқотчиси Стивен Бёржесс бу ҳақда шундай дейди: “Ичишни танлаган ҳар қандай шахс учун тадқиқотимиз очиқ натижа берди – қанча кўп алкоголь қабул қилинса, деменция хавфи шунчалик ошади. Ҳатто ўртача, кичик миқдорда ҳам хавфдан ҳоли эмас”.
Тадқиқот доирасида Буюк Британия ва АҚШда 560 минг нафарга яқин инсон бир неча йил давомида кузатилган. Биринчи босқичда улардан қанча миқдорда ичишлари сўралган, кейин эса спиртли ичимликлар билан деменция ўртасидаги боғлиқлик чуқур таҳлил қилинган. Олимлар шунингдек, генетик хусусиятларни ҳам ҳисобга олиб, одам умри давомида бу омил қандай таъсир кўрсатишини ўрганишди.
Натижалар шуни кўрсатдики, генетик жиҳатдан алкоголизмга мойил инсонларда хавф янада юқори бўлади. Масалан, ҳафтада уч марта ичимлик истеъмол қиладиган шахсда деменция ривожланиши эҳтимоли ҳафтада бир марта ичадиган одамга нисбатан 15 фоизга кўп экани қайд этилган.
Мутахассислар фикрича, жамиятда “озгина ичса зарар қилмайди” деган фикрга ишонмаслик керак. Ҳатто кам миқдордаги алкоголь ҳам инсон миясида бузилишларни келтириб чиқариши ва вақт ўтиши билан хотира, диққат ҳамда фикрлаш қобилиятини издан чиқариши мумкин.
Шифокорлар аҳолини хусусан ёшлар орасидан спиртли ичимликлардан эҳтиёт бўлишга чақирмоқда. Улар таъкидлашича, ичимликдан воз кечиш нафақат деменциянинг олдини олади, балки умумий соғлиқ ва умр сифатини ҳам яхшилайди.
«Замин»ни Telegram’да ўқинг!
