Норвегия ва Дания олимлари томонидан олиб борилган янги илмий тадқиқот натижаларига кўра, ҳар куни тахминан 100 дақиқа юриш сурункали бел оғриғига чалиниш хавфини қарийб 25 фоизга қисқартириши мумкин.
Тадқиқот муаллифларидан бири Раян Хаддаж мазкур натижаларни муҳим деб баҳолар экан, юришни оддий, арзон ва ҳар ким учун осон қўллаш мумкин бўлган жисмоний фаолият сифатида таърифлади. Унинг сўзларига кўра, юриш бел соҳасидаги сурункали оғриқларнинг олдини олишда самарали усул бўлиши эҳтимолдан холи эмас.
Тадқиқот жараёнида 20 ёшдан ошган 11 мингдан зиёд иштирокчининг кундалик ҳаракат фаоллиги ўрганилган. 2017–2019 йиллар давомида қатнашчилар етти кун мобайнида махсус акселерометр қурилмаларини тақиб юришган. Кейинчалик, 2021–2023 йилларда уларнинг соғлиғи қайта баҳоланиб, айниқса бел оғриғи мавжуд ёки йўқлигига алоҳида эътибор қаратилган.
Иштирокчилар юриш давомийлигига қараб тўрт тоифага ажратилган: кунига 78 дақиқадан кам юрувчилар, 78–100 дақиқа атрофида юрувчилар, 101–124 дақиқа юрувчилар ҳамда 125 дақиқадан ортиқ юрувчилар.
Таҳлиллар шуни кўрсатдики, инсон қанча кўп юрса, сурункали бел оғриғига дуч келиш эҳтимоли шунча камаяди. Шу билан бирга, ўртача суръатда ва тез қадам ташлаб юриш секин юришга нисбатан оғриқларнинг олдини олишда анча самарали экани аниқланган.
CNN маълумотларига кўра, ҳозирги кунда бутун дунё бўйлаб 600 миллиондан ортиқ инсон бел оғриғидан азият чекмоқда. Жаҳон соғлиқни сақлаш ташкилоти прогнозларига биноан эса, 2050 йилга келиб бу кўрсаткич 843 миллион кишига етиши мумкин.
“Zamin”ни Telegram'да ўқинг!
