Дунёнинг энг машҳур инвесторларидан бири бўлган Жим Рожерс Ўзбекистонга эътибор қаратмоқда

^{Фото: Forbes}
Дунёдаги энг машҳур инвесторлардан бири, Rogers Holdings раҳбари Жим Рожерс Ўзбекистонга эътибор қаратмоқда. Бу ҳақда Forbes’га таяниб Spot хабар берди.

«Мен янги Ўзбекистон ҳамон Ғарбда деярли номаълум бўлса-да, унинг катта ишқибозиман. Авваллари мамлакатда диктатура эди, аммо янги ҳукумат нима қилаётганини биладиган кўринади. Улар сўнгги бир неча йилда эришга ютуқлар мақтовга лойиқ», — дейди Рожерс.

Унинг таъкидлашича, иқтисодиёт ниҳоят очилган ва халқаро инвесторлар бу каби янги имкониятлардан, албатта, фойдаланади. «Мен уларнинг хусусийлаштириш бўйича эълон қилинган режалари ва IPO’ларини диққат билан кузатиб бораман», — деган Рожерс.

Америкалик инвесторга биринчи навбатда энергетика, металл ва қишлоқ хўжалиги қизиқ, бироқ Ўзбекистонда у бундан-да кўпроқ ишларни амалга оширишга тайёр.

«Айниқса, мени уларнинг туристик потенциали қизиқтиради. Уларнинг авиакомпанияси хусусийлаштирилса, албатта, ўйлаб кўраман. Uzbekistan Airways — қизиқарли инвестицион кейс», — дея таъкидлаган Рожерс.

Шунингдек, у меҳмонхоналарга ҳам қизиқишини билдирган, чунки Ўзбекистон Хитойнинг «Бир камар, бир йўл» ташаббусида муҳим ўринни эгаллайди.
«У ерда жуда жозибадор туристик йўналиш мавжуд. Шундай экан мен қидиряпман», — дейди Rogers Holdings раҳбари.

Жим Рожерс — дунёдаги энг машҳур инвесторлардан бири бўлиб, 1970 йилларда у Жорж Сорос билан биргаликда Quantum Fund фондига асос солган. Ўз навбатида фонд ўн йил ичида инвесторларга 4200 фоиз даромад олиб келган. Шунга қарамай, Рожерс 1980 йилда Уолл-Стритни тарк этган ва саёҳатлар билан шуғулланишга ўтган. 2014 йилдан бери Рожерс фаол равишда Россия активларига сармоя киритмоқда — хусусан, Москва биржаси, «ФосАгро» ва «Аэрофлот».

Янгиликлар