Сариосиёда 300 қўй жарликка қулагани тасдиқланди

Сурхондарё вилоятининг Сариосиё туманида бир отар қўй жарликка тушиб кетиши натижасида йўқотилган қўйлар сони 300 бошни ташкил этди. Бу ҳақда туман ветеринария ва чорвачиликни ривожлантириш бўлими раҳбари Шамшер Умедов маълум қилди.

Унинг сўзларига кўра, ушбу воқеа 25 май куни содир бўлган. “Бундай ҳолатлар аввал ҳам қайд этилган. Қўйлар бир-бирига эргашувчан – бири жарликка тушса, қолганлари ҳам ортидан боради. Ходимларимиз ва туман “СЭС” мутасаддилари бориб, сонини аниқлаб келишди. Қўйлар соғлом бўлган, ҳеч қандай касаллик йўқ”, – деди Умедов.

Унинг таъкидлашича, жарликка тушиб қолган қўйларни чиқаришнинг имкони бўлмаганлиги сабабли, шу ердаёқ икки маротаба махсус дорилар билан зарарсизлантирилган. “Ушбу ҳудуд аҳоли яшаш пунктларидан йироқда жойлашган. Шунинг учун ўлган қўйларни ёқиш ёки кўмиш имкони йўқ эди. Дорилар эса уларни бир ойда чиритиб, йўқ қилиб юборади, ҳеч қандай инфекция тарқалмайди”, – дея қўшимча қилди Умедов.

Шу билан бирга, ижтимоий тармоқларда тарқалган хабарларда профилактика инспектори, ижтимоий ходим ва маҳалла еттилиги қўйларни асосий қишлоқ йўлидан ўтказишга рухсат бермагани учун чўпон уларни жарлик бўйлаб олиб ўтишга мажбур бўлгани айтилади. Шамшер Умедов эса бу маълумотлардан бехабар эканлигини ва масала бўйича тегишли идоралар ўрганиш ишларини олиб бораётганини маълум қилди.