Ўзбекистон қоидабузарларга қарши уруш эълон қилди

Ўзбекистон Республикаси Президенти Шавкат Мирзиёев йўл ҳаракати қоидаларини мунтазам равишда бузувчиларга қарши янги ва қатъийроқ назорат тизими жорий этилишини маълум қилди. Давлат раҳбари йўллардаги вазият жиддий ташвиш уйғотаётганини таъкидлаб, тартиб ўрнатиш вақти келганини билдирди, деб UPL.uz хабар берди.

2024 йилда Ўзбекистонда ҳайдовчилар томонидан 24 миллионта қоидабузарлик қайд этилган бўлиб, уларнинг 81 фоизи қўпол бузилишлар сифатида баҳоланган. Энг мураккаб вазият Самарқанд, Қашқадарё, Тошкент вилоятлари ва пойтахтда кузатилмоқда.

Алоҳида хавотир уйғотган жиҳат — ижтимоий тармоқларда, жумладан, машҳур шахслар аккаунтлари орқали тарқалаётган “жарима тўлаб, қоида бузса бўлади” мазмунидаги масъулиятсиз қарашлардир. Президент бу каби муносабат қабул қилиб бўлмаслигини қатъий таъкидлаб, янги тизим орқали буни ўзгартириш, ҳайдовчилик маданиятини ошириш ва қоидабузарларга қонун кучини намойиш этиш лозимлигини билдирди.

Йўлдаги интизомни оширишга қаратилган «Системали қоидабузарлар» тизими доирасида қуйидаги ўзгаришлар жорий этилади:

. 1 ой ичида 2 марта қизил чироқда ўтиш ёки қарши йўлга чиқиш — 1 йилгача жарима чегирмалари бекор қилинади.
. 1 ойда 10 ёки ундан ортиқ қоидабузарлик — 6 ойга ҳайдовчилик гувоҳномасидан маҳрум этиш.
. Тезликни ошириш учун жарималар қайта кўриб чиқилади, 2–3 баробар ортиқ тезликда ҳаракат қилганлар ҳайдовчилик ҳуқуқидан маҳрум этилиши мумкин.

Бу чоралар ҳайдовчиларда йўл ҳаракати қоидалари ва бошқа қатнашчиларга нисбатан ҳурмат ва масъулиятни шакллантиришга хизмат қилади. «Замин»ни Telegram’да ўқинг!