Хитойнинг Сичуан вилоятида яшовчи ва фермерлик билан кун кечирувчи бир жуфтликнинг ажрашиш жараёнида содир бўлган воқеа маҳаллий аҳоли ва ижтимоий тармоқларда қизғин муҳокамага сабаб бўлди.
Маълумотларга кўра, улар бир неча йил давомида қишлоқда яшаб, чорвачилик билан шуғулланган ва уй хўжалигида 29 бош товуқ, 22 бош ғоз ҳамда икки бош ўрдак боққан. Оиладаги муносабатлар бузилиб, расмий тарзда ажрашишга қарор қилинганда, улар барча мол-мулкни, ҳатто паррандаларни ҳам мутлақо тенг тақсимлашни исташган.
Суд жараёнида судья икки йўлни таклиф қилган:
Биринчиси — ортиқча бўлган бир бош товуқни кимдир сотиб олиб, бошқа томонга пул бериш орқали масалани ҳал қилиш.
Иккинчиси — товуқни сўйиб, биргаликда истеъмол қилиш.
Жуфтлик ўйлаб кўргач, иккинчи таклифни маъқул кўрган ва шу ернинг ўзида ортиқча товуқ сўйилиб, тенг тақсимланган ҳолда дастурхонга тортилади.
Маҳаллий матбуот ва South China Morning Post нашри ёзишича, бу воқеа фермерлар ҳаётидаги оддий турмуш ҳикоясидан кўра анча кўпроқ маънога эга — у баъзи ҳолларда одамлар ўз ҳақ-ҳуқуқларини ҳатто майда-чуйда масалаларда ҳам қатъийлик билан ҳимоя қилишини кўрсатиб беради.
Томошабинлар ва ўқувчилар бу воқеани турлича баҳолашди: айримлар уни кулгили деб қабул қилса, бошқалар ажрашишдаги мол-мулк тақсимотига бўлган жиддий ёндашувни қадрлади.
«Замин»ни Telegram’да ўқинг!
