Самарқандда шифокорлар ноёб ва бир қарашда имконсиздек туюладиган операцияни амалга оширишди — 80 ёшли беморнинг 60 йилдан бери уни қийнаб келган йирик буқоғи жарроҳлик йўли билан олиб ташланди.
Маълумотларга кўра, кексайган бемор узоқ йиллар давомида операцияга рози бўлмаган, чунки жарроҳликдан қўрққан. Бироқ охирги вақтларда ҳатто сув ичиш ҳам азобга айланганидан сўнг у шифокорлар тавсиясини қабул қилди.
Тиббий жиҳатдан ноёб ҳолат
Марказий шифохонада ўтказилган текширувлар давомида беморда “гигант тугунли нотоксик бўқоқ” аниқланди. Бу — қалқонсимон бездаги жуда кам учрайдиган ва кўп йиллик ёд етишмовчилиги туфайли пайдо бўладиган касаллик. Профессор, тиббиёт фанлари доктори Аҳмаджон Бобожонов таъкидлашича, бундай ҳолатларда фақат операция орқали соғайиш мумкин.
“Жараёнда ҳар бир миллиметр муҳим аҳамиятга эга эди. Биз нафақат йирик тугунларни олиб ташлашимиз, балки беморнинг ҳаётий муҳим ҳиқилдоқ нервлари ва қон-томирларини асраб қолишимиз зарур бўлди. Операция муваффақиятли ўтди, натижада беморнинг нафас олиши ва ютиниши енгиллашди”, — дейди профессор.
Тезкор тикланиш ва умидли прогноз
Операциядан кейин бемор қисқа вақт ичида ўзига келиб, ҳаёти сифатини сезиларли даражада яхшилади. Ҳозирда у шифокорлар тавсиясига мувофиқ енгил реабилитация муолажаларини ўтказмоқда.
Мутахассислар эса бундай ҳолатлар ёд етишмовчилиги олдини олиш ва қалқонсимон без саломатлигини назорат қилиш зарурлигини эслатишмоқда. Улар аҳолини мунтазам тиббий кўрикдан ўтиб туришга ва касаллик белгиларига бепарво қарамасликка чақирди.
«Замин»ни Telegram’да ўқинг!
