Тошкент шаҳрида ёш блогерлар хайп орттириш мақсадида жуда хавфли ва баҳсли тажрибага қўл урди. Улар Lacetti русумли автомобилни Mercedes-Benz қисмлари билан қайта жиҳозлаб, уни пиёдалар учун мўлжалланган зинапоядан ҳайдаш орқали “синовдан ўтказиш”га қарор қилишди. Бу ҳолат шаҳар марказидаги Шайхонтоҳур туманида, йўл айланма кесишмаси яқинида содир бўлди, деб хабар берди маҳаллий манбалар.
Гувоҳларнинг сўзларига кўра, блогерлар махсус танлаб олинган пиёда зинапоясида машинасини тўлиқ “имтиҳон”дан ўтказишни мақсад қилган. Уларнинг айтишича, Mercedes-Benz’дан олинган мустаҳкам ва замонавий қисмлар Lacetti’ни ҳар қандай мураккаб йўл шароитида ҳам ҳаракатга тайёр қилади. Йигитлар бу жараённи видеога олиб, ижтимоий тармоқларда эълон қилди ва бир неча соат ичида кенг муҳокамаларга сабаб бўлди.
Интернетда тарқалган кадрлар баъзи фойдаланувчилар томонидан “оригинал контент” сифатида қабул қилинган бўлса-да, кўпчилик бундай ҳаракатни хавфсизлик қоидаларини қўпол бузиш ва пиёдалар ҳаётига таҳдид сифатида кескин танқид қилди.
Ҳуқуқ-тартибот идоралари видеотасвир тарқалиши биланоқ ҳаракатга ўтиб, воқеа иштирокчиларини аниқлади. Ички ишлар бошқармаси маълумотига кўра, улар маъмурий жавобгарликка тортилиши ҳақида қарор чиқарилди.
Тергов жараёнида блогерлар қилган ишлари учун чин дилдан афсусда эканликларини билдирган ва бундай турдаги хатарли “эксперимент”ларни такрорламасликка ваъда берган. Шу билан бирга, ҳуқуқ-тартибот идоралари бундай ҳолатлар нафақат иштирокчиларнинг, балки атрофдаги фуқароларнинг ҳам ҳаёти ва хавфсизлигига жиддий таҳдид туғдиришини таъкидлади.
Бу воқеа яна бир бор ижтимоий тармоқларда шон-шухрат орттириш йўлида қонун ва хавфсизлик чегараларини унутмаслик кераклигини кўрсатди. Хайп ортидан қувиш жуда қимматга тушиши мумкин — айниқса, у жамоат тартиби ва инсон ҳаёти эвазига бўлса.
«Замин»ни Telegram’да ўқинг!
