7 сентябрь куни ижтимоий тармоқларда кенг тарқалган видеолавҳа жамоатчиликнинг кескин баҳсларига сабаб бўлди. Кадрларда ҳайдовчи тез ёрдам машинасига йўл бермагани аниқ кўринган. Мазкур ҳолат бўйича Тошкент вилояти Йўл ҳаракати хавфсизлиги бошқармаси расмий изоҳ берди.
Маълумотларга кўра, воқеа Янгийўл тумани ҳудудида қайд этилган. Қонун ҳимоячилари олиб борган суриштирув ишлари натижасида видеода акс этган Lasetti ҳайдовчиси аниқланди.
Эркак ўз хатти-ҳаракатини шундай изоҳлади:
“Мен ҳам иш билан шошиб қолдим. Машина ичида мусиқа жуда баланд эди, деразалар ёпиқ турган. Шу боис сирена ва сигналларни эшитмадим. Фақат машина яқинлашганда тушундим. Хатонинг жиддийлигини англадим, бундай ҳолат такрорланмайди.”
Ҳуқуқ-тартибот органлари ҳайдовчига нисбатан қонунчиликда белгиланган моддалар асосида маъмурий баённома расмийлаштирди. Шу билан бирга, у билан профилактик суҳбат ўтказилиб, йўлдаги масъулият ва эҳтиёткорликнинг аҳамияти тушунтирилди.
Мутасаддилар таъкидлашича, йўлдаги ҳар бир дақиқанинг аҳамияти бор, айниқса, тез ёрдам каби махсус хизмат воситаларига йўл бермаслик инсон ҳаётига хавф солиши мумкин. Шу сабаб ҳайдовчилардан қоидаларга қатъий риоя қилиш талаб этилади.
«Замин»ни Telegram’да ўқинг!
