Фарғона вилоятининг Қўқон шаҳрида Nexia автомобили ҳайдовчисининг маст ҳолда ҳаракатланиши йўл-транспорт ҳодисасига сабаб бўлди, деб хабар берди вилоят ЙҲХБ матбуот хизмати.
Маълумотларга кўра, 10 сентябрь куни соат тахминан 20:00 да Мовароуннаҳр кўчасида Nexia русумли енгил машина бошқарувини йўқотиб, йўл четида тўхтаб турган юк машинасига бориб урилган. Ҳодиса натижасида инсонлар орасида жабрланувчилар қайд этилмади.
Ўтказилган тиббий экспертиза Nexia ҳайдовчисининг ҳодиса вақтида алкоголь таъсирида бўлганини тасдиқлаган. Ҳозирда ҳар икки транспорт воситаси жарима майдонига жойлаштирилган ва қонунбузарлик бўйича дастлабки тергов ҳаракатлари бошлаб юборилган.
ЙҲХБ мутасаддилари ушбу ҳолат ҳайдовчилар ўртасида масъулиятсизлик ва маст ҳолда транспорт бошқариш ҳолатлари ҳали ҳам учраб турганини эслатиб ўтди. Ҳуқуқни муҳофаза қилувчи органлар ҳолат юзасидан қонуний чора кўришини маълум қилган.
«Замин»ни Telegram’да ўқинг!
