Тошкент вилоятида тўй маросими чоғида қўпол қоидабузарлик содир этган куёв ва яна бир нечта фуқароларга нисбатан ҳуқуқий чоралар кўрилди. Бу ҳақда ИИВ Жамоат хавфсизлиги департаменти маълум қилди.
Маълумотларга кўра, Олмалиқ шаҳрида куёв тўй маросими пайтида ўзининг Vaz-2107 автомобили билан дрифт қилиб, йўл ҳаракати қоидаларини қўпол равишда бузган. Бу ҳолат кўпчиликнинг эътирозига сабаб бўлди. Куёв эса қилмишидан афсусланиб: “Ўз тўйимда бўлиб қолди, афсусдаман. Бу ҳолат бошқа такрорланмайди”, деган.
Тергов давомида маълум бўлишича, қоидабузарлардан бири ўз автомашинаси давлат рақам белгисини бошқа машинага ўрнатиб, йўлда қонунбузарлик содир этган. Ушбу ҳаракатлар "йўл безориликлари" сифатида баҳоланди.
Ҳозирда барча ҳайдовчиларга нисбатан маъмурий баённома расмийлаштирилиб, жарима қарорлари қабул қилинди. Шунингдек, куёвнинг автомобили жарима майдонига жойлаштирилган ва ҳужжатлар судга юборилган.
Эслатиб ўтамиз, аввалроқ Самарқандда ҳам тўй маросими чоғида дрифт қилиб, қўпол қоидабузарлик содир этган беш нафар шахс жазога тортилган эди.
«Замин»ни Telegram’да ўқинг!
