Бухорода содир бўлган ноодатий воқеа аҳоли орасида катта муҳокамаларга сабаб бўлди. Вилоят ИИББ тарқатган маълумотларга кўра, ёш йигит интернет орқали сотилаётган қимматбаҳо телефонни ҳийла билан қўлга киритишга уринди ва бунинг оқибатида қатор жиноий қилмишларни амалга оширди.
Маълумотларга кўра, 14 сентябрь куни Бухоро туманида яшовчи фуқаро ўзининг iPhone русумли телефонини сотиш учун интернет тармоқларидан бирида эълон жойлаштирган. Бир муддат ўтиб унга номаълум шахс қўнғироқ қилиб, телефонни харид қилиш нияти борлигини билдирган. У оқ рангли, ойналари қорайтирилган, давлат рақам белгиси йўқ “Nexia 3” автомобилида келиб, пулини машинадан олиб беришини айтган. Шу баҳона билан у эълон берувчини автомашинага чақириб, телефонини олиб кетиб қолган.
Шу пайтдан бошлаб вилоят бўйича “Тўсиб ушлаш” махсус режаси ишга туширилди. Тунги соат 02:30ларда ҳуқуқ-тартибот идоралари барча постларини ҳушёр ҳолатга келтирди.
Олиб борилган тезкор қидирув ишлари натижасида “Nexia 3” автомобили Бухоро шаҳридаги Ислом Каримов кўчасида ҳаракатланаётгани аниқланди. Соат 04:41 да эса автомашина ҳайдовчиси — 2003 йилда туғилган, Бухоро шаҳар “Фошун” маҳалласида истиқомат қилувчи М.А. — ЙПХ ходимларининг қонуний тўхташ ишораларига бўйсунмади. У қочиш жараёнида бир нечта транспорт воситаларига зарар етказиб, кўчада тартибсизлик келтириб чиқарди.
Натижада ҳайдовчи ва автомашина тўлиқ тўхтатилиб, қўлга олинди. Ҳозирда Бухоро вилояти прокуратураси томонидан Ўзбекистон Республикаси Жиноят кодексининг 219-моддаси 2-қисми (ҳокимият вакилларига бўйсунмаслик) ҳамда 166-модданинг 3-қисми (талончилик) билан жиноят иши қўзғатилди. ЖПКнинг 221-моддаси асосида М.А. қамоққа олинди.
Вилоят ИИББ ва прокуратура ҳозирда дастлабки тергов ишларини олиб бормоқда. Мутахассислар таъкидлашича, бу каби ҳолатлар наfaqat қонун бузилишини, балки йўл ҳаракати хавфсизлигига ҳам жиддий таҳдид солади.
Мазкур воқеа жамоатчиликка яна бир бор шахсий мулкни интернет орқали сотишда эҳтиёткорлик зарурлигини эслатмоқда. Чунки ҳозирги кунда айрим шахслар турли ҳийла ва фириб йўллари билан бошқаларнинг мулкини қўлга киритишга уринмоқда.
«Замин»ни Telegram’да ўқинг!
