Бухоро вилояти Жондор туманида содир бўлган ёнғин жамоатчилик орасида катта шов-шувга сабаб бўлди. Ижтимоий тармоқларда тарқалган видеоларда янги қурилган клиника биноси алафдай ёнаётгани акс этгани фуқароларнинг жиддий хавотирини уйғотди.
Вилоят Фавқулодда вазиятлар бошқармаси маълумот беришича, воқеа 30 сентябрь куни соат 19:17 да Жондор тумани “Шўробод” маҳалласида жойлашган, ҳали фаолият бошламаган 3 қаватли бино ҳудудида рўй берган. Ҳодиса ҳақида хабар олишлари билан 6 та ёнғин-қутқарув отряди 3 дақиқа ичида жойига етиб борган ва ёнғин 19:30 да назоратга олинган. Қутқарувчиларнинг саъй-ҳаракатлари билан аланга соат 20:55 да тўлиқ ўчирилган.
Ҳозирда ёнғиннинг келиб чиқиш сабаби ва етказилган зарар миқдори бўйича махсус текширув ишлари олиб борилмоқда. Муҳими, ҳодиса пайтида ҳеч ким тан жароҳати олмагани расман тасдиқланди.
Эслатиш жоиз, бир неча кун аввал ҳам Тошкент шаҳрининг Янгиҳаёт туманида ёғочдан қурилган уй ёнғинга учраган эди. Ўша ҳодисада ҳам инсонлар жабрланмаган, аммо бино бутунлай ёниб кетгани қайд этилган.
Мутахассислар таъкидлашича, бундай ёнғинлар профилактикаси учун электр ва газ тизимларини назорат қилиш, хавфсизлик қоидаларига қатъий риоя қилиш ҳар бир объект учун жуда муҳим. Янги биноларда эса, айниқса, қурилиш жараёнида хавфсизлик талабларига алоҳида эътибор қаратилмаса, оқибатлар оғир бўлиши мумкин.
Шу тариқа, Бухорода содир бўлган мазкур ёнғин ҳеч кимнинг ҳаётига хавф туғдирмади, аммо жамоатчиликка яна бир бор огоҳлик қоидаларига амал қилиш зарурлигини эслатди.
“Zamin”ни Telegram'да ўқинг!
