Самарқандда жорий йил май ойида юз берган ва етти инсоннинг ҳаётига нуқта қўйган портлаш иши бўйича суд ҳукми эълон қилинди.
Тергов маълумотларига кўра, фожеа Самарқанд шаҳридаги хусусий уйда содир бўлган. Портлаш оқибатида бир оиланинг етти аъзоси ҳалок бўлган, бир неча уй ва қурилмаларга катта зарар етган.
Текширув жараёнида маълум бўлишича, портлашга сабаб бўлган газ тармоғи лойиҳа ҳужжатларисиз ва хавфсизлик талабларига зид ҳолда ўрнатилган. Энг оғриқлиси шундаки — хонадон эгалари бу ҳолат ҳақида 11 марта тегишли ташкилотларга мурожаат қилган, аммо уларнинг бирортасига жавоб бермаганлар.
Шундай қилиб, “Самарқанд ҳудуд газ таъминоти” корхонаси ходимларининг лоқайдлиги ва масъулиятсизлиги туфайли газ оқими марказий оқова қудуғига сизниб, чақнаш оқибатида кучли портлаш содир бўлган.
Фожеа нафақат бир оиланинг ҳаётини барбод қилди, балки бутун маҳаллада чуқур из қолдирди. Кўпчилик ҳали ҳам ўша тунни ёдга оларкан, адолат тикланишини кутиб яшаганини айтиб ўтди.
Суд жараёнида аниқланишича, корхонанинг тўрт нафар масъул ходими жиноятга бевосита алоқадор бўлган. Уларга нисбатан Жиноят кодексининг 116-моддаси 4-қисми “а” ва “б” бандлари асосида айблов қўйилган. Суд ҳар бирига етти йил муддатга озодликдан маҳрум этиш жазосини тайинлади.
Шу билан бирга, суд қарорiga кўра, “Самарқанд газ таъминоти” корхонаси фуқаролар олдидаги моддий жавобгарликни ҳам зиммасига олади. Корхонадан портлаш оқибатида зарар кўрган фуқаролар фойдасига қарийб 6 миллиард сўм ундирилади.
Бу иш нафақат бир фожеанинг ёпилиши, балки масъулиятсизликнинг жавоби сифатида баҳоланмоқда. Чунки ҳар бир мурожаат, ҳар бир сигнал ўз вақтида эшитилганида, бу етти инсон бугун тирик бўлиши мумкин эди.
Муттахассислар таъкидламоқда: газ тизимидаги ҳар бир хато — инсон ҳаёти билан боғлиқ. Бундай воқеалар такрорланмаслиги учун тизимда нафақат техник, балки инсонпарварлик назорати ҳам кучайтирилиши зарур.
“Zamin”ни Telegram'да ўқинг!
