Тошкентда Telegram орқали синтетик гиёҳванд моддалар сотиш билан шуғулланган жиноий гуруҳ фош этилди, деб хабар берди ИИББ матбуот хизмати.
Маълум қилинишича, ҳуқуқ-тартибот органлари томонидан Юнусобод ва Миробод туманларида ўтказилган тезкор тадбирлар натижасида гумонланувчилар қўлга олинган. Улардан жами 109 грамм синтетик гиёҳванд модда аниқланиб, далилий ашё сифатида мусодара қилинган.
Тергов жараёнида маълум бўлишича, гуруҳ Telegram орқали “дўкон” очиб, буюртмаларни қабул қилиш, моддаларни “жойлаштириш” ва курьерлар орқали етказиб бериш тизимини йўлга қўйган. Улар фаолиятини бутунлай интернет орқали амалга оширган.
Олиб борилган ҳаракатлар натижасида жиноий тармоқнинг фаолиятига чек қўйилди. Тарқатишга мўлжалланган 545 дона синтетик модда ва тахминан 131 миллион сўмлик ноқонуний маҳсулот мусодара қилинди.
Ҳозирда мазкур ҳолат бўйича Жиноят кодексининг 273-моддаси (“гиёҳванд моддаларни ноқонуний тайёрлаш ва тарқатиш”) билан жиноят иши қўзғатилган. Гумонланувчилар қамоққа олинган, тергов ҳаракатлари давом этмоқда.
Тошкент шаҳар ИИББ жиноий тармоқнинг барча боғланишларини аниқлаш ва тарқатиш занжирини тўлиқ йўқ қилиш бўйича иш олиб бормоқда.
“Zamin”ни Telegram'да ўқинг!
