Наманганда “заправка”даги портлаш бир инсон ҳаётини олди

Наманган вилоятида автомобилларга ёнилғи қуйиш шохобчасида рўй берган портлаш бир инсоннинг ҳаётига зомин бўлди, деб хабар берди viloyat FVB.

Маълумотларга кўра, фожиа 25 октябрь куни соат 18:47 да Чуст тумани “Бирлик” маҳалласида содир бўлган. Фаолияти вақтинча тўхтатилган ёнилғи қуйиш шохобчасида 10 тоннали ёнилғи сақлаш цистернасини бошқа жойга кўчириш ишлари олиб борилаётган бўлган.

Дастлабки маълумотга кўра, иш жараёнида ёнғин хавфсизлиги талаблари бузилган ва натижада чақнаш содир бўлган.

Пайвандлаш ишларини бажараётган ишчи олинган жароҳатлар сабаб воқеа жойида ҳалок бўлган.

Фавқулодда вазиятлар хизмати учта ёнғин-қутқарув бўлинмаси билан воқеа жойига етган ва ёнғин тарқалишининг олди ўз вақтида олинган.

Ҳозирда портлашнинг аниқ сабаблари ва етказилган моддий зарар миқдори ўрганилмоқда.

Камола Шухратова

«ZAMIN.UZ» муҳаррири