Алимент талашидан кейинги фожеа: эркак хотини ва қизини ўлдирди

Фарғонада алимент масаласи ортидан оғир жиноят содир этилди, деб хабар берди zamon.uz.

Маълумотларга кўра, 3 ноябрь куни соат 18:00 ларда 34 ёшли эркак 27 ёшли турмуш ўртоғи билан фарзанд учун тўлов масаласида тортишувга киришган.

Баҳс давомида у жаҳли чиқиб, ошхона пичоғи билан хотини ва икки ёшли қизига ҳужум қилган. Яқинларининг сўзларига кўра, жанжал бир неча дақиқада фожеага айланган.

Жабрланганлар шифохонага етказилган бўлса-да, кўрилган жароҳатлар оқибатида она ва бола ҳаётдан кўз юмган.

Ҳужумдан кейин эркак воқеа жойидан қочган, аммо тез орада ҳуқуқ-тартибот идоралари томонидан қўлга олинган.

Бош прокуратура маълумотига кўра, мазкур ҳолат юзасидан жиноят иши қўзғатилиб, эркакка нисбатан Жиноят кодексининг 97-моддаси бўйича тергов ҳаракатлари бошланган.

Ҳозирда суриштирув давом этмоқда. Маҳаллий аҳоли бу воқеани катта қайғу ва изтироб билан қарши олган.