Самарқанд шаҳрида кечаси кичик қизалоқ қудуққа тушиб кетди, деб хабар берди Фавқулодда вазиятлар вазирлиги матбуот хизмати.
Маълумотларга кўра, ҳодиса 7 ноябрь куни соат 22:48 атрофида “Абу Райҳон Беруний” кўчасида содир бўлган. Қўрқув ва саросимага тушган аҳоли ФВВга мурожаат қилиб, болани қутқариш учун ёрдам сўраган.
Қутқарувчилар воқеа жойига зудлик билан етиб бориб, махсус жиҳозлар ёрдамида қизалоқни қудуқдан чиқаришган. Операция тез ва аниқ ҳаракатлар билан амалга оширилиб, бола жароҳат олмаган ҳолда қутқарилган.
ФВВ маълум қилишича, қизалоқ соғ-саломат ҳолда ота-онасига топширилган. Мутасаддилар аҳолини бундай ҳолатларни олдини олиш учун хавфсизлик қоидаларига қатъий риоя этишга, айниқса болаларни қарабсиз қолдирмасликка чақирди.
Самарқанддаги ушбу ҳолат яна бир бор эҳтиётсизлик нечоғлик хавфли эканини эслатди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
