“Қашқадарёликман, зўринг борми?” Тошкентда ҳайдовчиларни ҳақоратлаган эркакга қаттиқ чора кўрилди

Тошкент кўчаларида вазиятни беқарорлаштирган, йўл ўртасида ҳайдовчиларни ҳақорат қилиб, транспорт ҳаракатига тосқинлик келтирган шахсга суд жавоби берилди. Маълумотларга кўра, воқеа 13 ноябрь куни Яшнобод туманида содир бўлган.

Ижтимоий тармоқларда тарқалган видеоларда эркак ҳайдовчиларга нисбатан қўпол сўзлар ишлатиб, “Қашқадарёликман, зўринг борми?”, деб бақириб, йўл ҳаракатига жиддий халақит келтиргани яққол кўринади. Бу эса фақат осойишталикни эмас, жамоат тартибини ҳам бузган.

Суд мажлисида у айбини тан олган, қилган ҳаракати учун афсусдалигини билдирган ва енгилроқ чора сўраган. Бироқ суд унга Маъмурий жавобгарлик кодексининг 183-моддаси — майда безорилик бўйича айблов қўллаб, 10 сутка маъмурий қамоқ жазосини белгилади.

Шунингдек, махсус қабулхонада сақлаш харажатлари учун ҳар кунига БҲМнинг 15 фоизи ҳисобидан, жами 618 минг сўм давлат фойдасига ундириладиган бўлди.

Kamola Shuhratova

«ZAMIN.UZ» муҳаррири