Ижтимоий тармоқларда Бекобод туманида содир бўлган оғир йўл-транспорт ҳодисаси кенг муҳокамага сабаб бўлди. Хабарларга кўра, Ички ишлар бўлими Жиноят қидируви бўлими тезкор ходими Nexia-3 автомашинасида пиёдани уриб юборган, натижада 43 ёшли эркак ҳалок бўлган.
Бош прокуратура матбуот котиби Ҳаёт Шамсутдиновнинг маълум қилишича, воқеа жорий йилнинг 11 декабрь куни “Қорасув–Бўка–Бекобод” йўлининг 64-километрида содир этилган. Оқ рангли Nexia-3 пиёдани уриб кетган ва автоҳалокат оқибатида Б.У. вафот этган.
Мазкур ҳолат юзасидан 12 декабрь куни Бекобод тумани прокуратураси томонидан Жиноят кодексининг 266-моддаси 2-қисми ҳамда 117-моддаси 2-қисми билан жиноят иши қўзғатилди. Гумонланувчи шахсга нисбатан қамоққа олиш тарзидаги эҳтиёт чораси қўлланилган.
Айни пайтда, ҳалок бўлган фуқаронинг мурдасини топиш бўйича тезкор-қидирув тадбирлари давом этмоқда. Воқеа атрофидаги барча ҳолатларга ҳуқуқни муҳофаза қилувчи органлар томонидан тўлиқ ҳуқуқий баҳо берилиши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
