Жиззах вилоятида кўпчиликни ҳайратга солган ҳолат аниқланди. Фориш туманида бир аёл алиментдан қарздор бўлган турмуш ўртоғи билан бир уйда яшаб келган ҳолда, ундан алимент ундиришни талаб қилиб келган.
МИБ маълумотларига кўра, фарзанд таъминоти учун алимент тўлашдан қасддан бўйин товлаб, давлат ижрочиси олдига келмаган Х.Д.га нисбатан қидирув эълон қилинган. Тезкор-қидирув тадбирлари давомида у Жиззах шаҳридаги “Олмозор сити” ҳудудида алимент ундирувчи — яъни турмуш ўртоғи билан бирга истиқомат қилиб келаётгани маълум бўлган.
Қидирувда бўлган шахс аниқланиб, кейинги ижро ҳаракатларини амалга ошириш учун Фориш тумани давлат ижрочисига топширилган. Маълум бўлишича, Х.Д.нинг алимент бўйича қарзи 10 миллион сўмдан ошиб кетган.
Аёл эса нима сабабдан бу ҳолатни яшириб келгани ҳақида сўралганда, эрининг қамалишини истамаслигини, алимент маблағлари қамоқ чорасисиз ундирилишини хоҳлаганини билдирган.
Айни пайтда, қарздорга нисбатан қонун доирасида белгиланган ижро чоралари давом эттирилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
