Тошкент шаҳрида ижтимоий тармоқларда муҳокамага сабаб бўлган ҳолат бўйича расмий муносабат билдирилди. Хусусан, Тошкент давлат тиббиёт университети яқинида ҳинд тилида ёзилган реклама пешлавҳаси ўрнатилгани ҳақида тарқалган хабарлардан сўнг пойтахт ҳокимлиги томонидан текширув ўтказилди.
Ўрганишлар натижасида мазкур реклама пешлавҳаси белгиланган тартибда рухсат олинмасдан, қонунга зид равишда жойлаштирилгани аниқланди. Шунингдек, рекламада ахборот бериш қоидаларига риоя этилмагани, жумладан, “Давлат тили тўғрисида” ҳамда “Реклама тўғрисида”ги қонун талаблари бузилгани қайд этилди.
Маълум қилинишича, амалдаги қонунчиликка мувофиқ, Ўзбекистон ҳудудида жойлаштириладиган барча реклама материаллари аввало давлат тилида бўлиши шарт. Зарур ҳолларда қўшимча равишда бошқа тиллардан ҳам фойдаланиш мумкин, бироқ давлат тилидаги матн асосий ва устувор ҳисобланади. Шу билан бирга, ҳар қандай реклама ташқи ахборот воситаларини жойлаштириш учун тегишли рухсат ҳужжатлари талаб этилади.
Аниқланган қоидабузарликлар асосида ҳинд тилида ёзилган ноқонуний реклама пешлавҳаси белгиланган тартибда демонтаж қилинди. Тошкент шаҳар ҳокимлиги тадбиркорлар ва ташкилотларни реклама баннерлари, пешлавҳалар ҳамда ташқи ахборот воситаларини ўрнатишда қонун талабларига қатъий амал қилишга чақирди.
Шунингдек, бундай ҳолатлар такрорланса, реклама материаллари олиб ташланиши ва масъул шахсларга нисбатан қонунчиликда назарда тутилган чоралар кўрилиши эслатиб ўтилди.
