Андижондаги боғда аттракцион қулаб тушди, одамлар жароҳат олди
Андижон шаҳридаги Заҳириддин Муҳаммад Бобур номидаги истироҳат боғида аттракцион занжири узилиб кетиши оқибатида носозлик юз берди ва қурилма қулаб тушди. Расмий маълумотларга кўра, ҳодиса натижасида икки киши енгил жароҳатланган бўлса-да, ижтимоий тармоқларда жабрланганлар сони кўпроқ экани айтилмоқда. Жабрланувчиларга зудлик билан тиббий ёрдам кўрсатилган ва ҳозирда тегишли идоралар томонидан ўрганиш ишлари олиб борилмоқда. Мазкур бахтсиз ҳодиса жамоатчилик орасида кўнгилочар масканлардаги хавфсизлик ва техник кўрик масалаларини яна бир бор кун тартибига чиқарди.
Андижон вилоятидаги истироҳат боғида содир бўлган бахтсиз ҳодиса оқибатида бир неча фуқаро жароҳатланди. Бу ҳақда вилоят Фавқулодда вазиятлар бошқармаси маълум қилди.
Қайд этилишича, 26 апрель куни Заҳириддин Муҳаммад Бобур номидаги истироҳат боғида жойлашган аттракционда носозлик юз берган. Занжир узилиб кетиши натижасида қурилма қулаб тушган.
Дастлабки маълумотларга кўра, темир конструкциянинг синиши оқибатида икки нафар фуқаро енгил тан жароҳати олган. Уларга зудлик билан тиббий ёрдам кўрсатилган.
Шу билан бирга, ижтимоий тармоқларда тарқалган хабарларда жабрланганлар сони кўпроқ — камида етти нафар экани айтилмоқда. Видеоларда ҳодисадан сўнг аттракцион қисмлари ерга сочилиб кетганини кўриш мумкин.
Айрим фойдаланувчилар эса бундай кўнгилочар қурилмалар мунтазам техник кўрикдан ўтказилмаётганини таъкидлаб, хавфсизлик масаласига жиддий эътибор қаратиш зарурлигини билдирмоқда.
Ҳозирда ҳолат юзасидан тегишли идоралар томонидан ўрганиш ишлари олиб борилмоқда.
Изоҳлар 0
…