Наманган вилоятида инсонпарварлик ва жасорат намунасига айланган воқеа юз берди. Фавқулодда вазиятлар хизмати ходими оқимда оқиб кетаётган кичик ёшли болани қутқариб қолди.
Маълум қилинишича, 26 апрель куни Янги Наманган туманидаги “Мингтерак” маҳалласи ҳудудидан ўтувчи Катта Наманган каналида 3 ёшли бола сувга тушиб, оқим бўйлаб кетган.
Айнан шу вақтда Давлатобод тумани ФВВ бўлими ходими Улуғбек Асқаров хизматдан қайтиб кетаётган эди. У тасодифан боланинг хавфли ҳолатда эканини пайқаб қолиб, бир зумда ҳаракатга ўтган.
Қутқарувчи ҳеч иккиланмасдан сувга сакраб тушиб, чўкиб кетаётган болани олиб чиққан ва унинг ҳаётини сақлаб қолган. Таъкидланишича, болага зудлик билан ёрдам кўрсатилган ва ҳозирда унинг аҳволи яхши.
Ушбу қутқарув жараёни маҳаллий аҳолининг уйига ўрнатилган кузатув камераси орқали ҳам тасвирга тушиб қолган.
Мазкур ҳолат қутқарувчиларнинг ҳар қандай вазиятда тайёр ва фидойи эканини яна бир бор исботлади.
