Тошкент шаҳрида катта миқдордаги пиротехника воситалари ноқонуний савдосининг олди олинди

Аҳоли орасида пиротехника воситалари савдоси билан ноқонуний равишда шуғулланиш қонунчиликда белгиланган тартибда жавобгарликка сабаб бўлиши ҳақида мунтазам равишда тушунтириш тарғибот ишлари олиб борилади.

Бироқ, ҳар йили Янги йил байрами яқинлашгани сари ноқонуний йўллар билан мамлакатимизга олиб келинган, хавфсизлик талабларига жавоб бермайдиган пиротехника воситаларини кўча-куйда пуллаб, мўмай даромад қилишни мақсад қилган «уддабурон сохта тадбиркорлар» пайдо бўла бошлайди. Яъни, турли кўнгилсизликларга, ҳатто, инсон ҳаётига зомин бўлиш каби салбий ҳолатларни келтириб чиқараётганига қарамасдан бундай воситалар савдоси билан шуғулланишга уриниш ҳолатлари ҳамон учрамоқда.

Тошкент шаҳар давлат солиқ хизмати органлари томонидан пойтахтимизнинг Бектемир туманида ўтказилган профилактик тадбирлар давомида Фарғона вилояти Марғилон Шаҳрида яшовчи, 1988 йилда туғилган фуқаро Нозима Шокирова (исм ва фамилиялар ўзгартирилган) ҳеч қандай ҳужжатларсиз пиротехника воситаларини савдога қўйгани аниқланди. Тадбир давомида 3 турдаги 333 дона (қути) умумий қиймати 8 миллион 910 минг сўмлик пиротехника маҳсулотлари ноқонуний савдосининг олди олинди.

Профилактик тадбирлар давомида Бектемир тумани, Нурашон кўчасида яшовчи, 1991 йилда туғилган яна бир фуқаро Улуғбек Умматов ҳам 3 турдаги 15 дона (қути) умумий баҳоси 800 минг сўмлик пиротехника воситаларини мўмай даромад эвазига пуллаш пайида бўлгани маълум бўлди.

Ҳудди шунингдек, Тошкент вилояти Оқкурғон туманида истиқомат қилувчи, 1998 йилда туғилган фуқаро Шодиёр Дониёров республикамизга ноқонуний йўллар билан олиб келинган 20 дона умумий қиймати 800 минг сўмлик пиротехника воситаларини ноқонуний савдога қўйгани аниқланди.

Эслатиб ўтамиз, Ўзбекистон Республикаси Маъмурий жавобгарлик тўғрисидаги кодекси ҳамда Жиноят кодексининг тегишли моддаларида пиротехника буюмларининг қонунга хилоф муомаласи учун жавобгарлик ва жазо чоралари белгиланган.

Ҳурматли фуқаролар!
Унутманг ноқонуний пиротехника воситалари энг кўп фарзандларимиз соғлиғига ва ҳатто ҳаётига хавф туғдиради. Шундай экан айни кунларда ён-атрофда пиротехника воситалари пайдо бўла бошлагани, яъни «пақилдоқ»лар овози кўпайиб қолгани барчамизни сергак торттириши лозим. Зеро, бу каби салбий ҳолатларга қарши курашишда нафақат тегишли идоралар балки, барчамиз баравар ҳаракат қилсак, кўзланган натижага эришамиз.

“Замин” янгиликларини “Инстаграм”да кузатиб боринг