Шавкат Мирзиёев 24 июнь куни Москвада бўлиб ўтадиган Ғалаба парадида иштирок этиши маълум қилинди

^{Фото: «РИА Новости»}
Россия 24 июнь куни Москвада бўлиб ўтадиган Ғалаба парадига ташриф буюриш бўйича Қозоғистон, Молдова, Тожикистон, Туркманистон, Ўзбекистон, Сербия ва Хорватиядан тасдиқ жавобини олган. Бу ҳақда Россия президенти матбуот котиби Дмитрий Песков маълум қилди, деб ёзмоқда «РИА Новости».

Хабар берилишича, журналистлар Песковдан Москвадаги Ғалаба парадида иштирокини кимлар тасдиқлаганини сўраган.

Бунга жавобан Песков дастлабки рўйхат борлигини, айни пайтда бу масалада иш олиб борилаётганини билдирган.
«Биз Қозоғистон, Қирғизистон, Молдова, Тожикистон, Туркманистон, Ўзбекистондан тасдиқ жавоби олдик, шунингдек, Сербия, Хорватия, Абхазия, Жанубий Осетиядан ҳам тасдиқ бор», — дея маълум қилган Песков.

Шунингдек, Песков бир қатор давлатлар раҳбарлари таклифнома олгани, Россия улардан тасдиқ кутаётганини айтган.

Аввалроқ Владимир Путин Москвада ўтадиган Ғалаба парадига барча МДҲ давлатлари раҳбарларини таклиф қилгани ва Тожикистон президенти Эмомали Раҳмон парадда иштирок этишини тасдиқлагани ҳақида хабар берилганди.

Эслатиб ўтамиз, Владимир Путин коронавирус тарқалиши билан боғлиқ вазият сабаб 9 майда ўтиши лозим бўлган Ғалаба парадининг ўтказилишини кечиктирган, бироқ тадбирларнинг қайси санада ўтишига аниқлик киритмаганди. Кейинроқ Путин параднинг 24 июнь куни ўтказилишини маълум қилди. “Замин” янгиликларини “Инстаграм”да кузатиб боринг