Европа Иттифоқи 150 миллиард евроли SAFE жамғармасига йўл очди

Европа Иттифоқи Кенгаши 27 май сешанба куни қабул қилган баёнотда Европа Иттифоқи томонидан 150 миллиард еврога тенг Security Action for Europe (SAFE) мудофаа жамғармаси яратилиши маъқуллангани эълон қилинди.

Пресс-релизга кўра, янги жамғарма аъзо давлатларни қўшма харидлар орқали мудофаа саноати ишлаб чиқаришини кенгайтиришга қўшимча рағбат беради ҳамда Европа мудофаа саноати ва технологик базасига шошилинч ва катта сармояларни молиялаштиради.

Баёнотда таъкидланишича, бу ташаббуснинг асосий мақсади – ишлаб чиқариш қувватини ошириш, мудофаа ускуналарининг доимий мавжудлигини таъминлаш ва эҳтиёжларни қоплаш билан бир қаторда, Европа Иттифоқи умумий мудофаа қобилиятини кучайтиришдир.

Шунингдек, SAFE жамғармаси Европа Иттифоқига Украинага ёрдам беришни давом эттириш имконини беради. Бу орқали Украина мудофаа саноатини дастлабки босқичдаёқ қўллаб-қувватлаш назарда тутилган.

Қайд этилишича, ажратиладиган маблағлар аъзо давлатларга сўров асосида «рақобатбардош» фоизлар билан узоқ муддатли кредитлар шаклида берилади. Бироқ, ушбу кредитлар учун шартлардан бири – камида яна иккита давлат билан ҳамкорликда харидларни амалга ошириш талаб этилади. «Замин»ни Telegram’да ўқинг!