Блогер Фарҳод Маннопов ўлими билан боғлиқ шов-шувли иш юзасидан судда кескин бурилиш содир бўлди. Илк судда жазо олган ЛОР шифокор апелляция тартибида оқланди ва унинг қилмишида жиноий аломатлар топилмади, деб ҳисоблади суд. Бу ҳақда Kun.uz хабар берди.
Блогер 2023 йил 5 март куни риносептопластика операцияси вақтида кома ҳолатига тушган ва бир неча соат ўтиб вафот этган эди. Унинг ўлими ортидан жиноий иш очилиб, жамоатчиликда бу иш катта муҳокамаларга сабаб бўлган.
Биринчи инстанция суди ЛОР шифокорни 5 йил озодликни чеклаш ва 2 йил тиббиёт соҳасида ишлаш ҳуқуқидан маҳрум қилишга ҳукм қилган. Бироқ у бундай қарордан норози бўлиб, апелляцияга шикоят киритган ва суд иши қайта кўриб чиқилган.
Суд ҳужжатларига кўра, Фарҳод Маннопов “Star Med Center” клиникасида операция чоғида анестезиолог шифокор томонидан етарли даражада назорат қилинмаган. Анестезиолог айнан операция пайтида икки маротаба телефонда суҳбатлашган. Бу вақт мобайнида беморнинг тана ҳарорати кўтарилиб кетганини ўз вақтида аниқлай олмаган. Кейинчалик беморнинг юраги бир неча марта тўхтаб, оқибатда у кома ҳолатига тушган.
Беморнинг организмида анафилактик шок — оғир аллергик реакция ривожлангани аниқланган. Анафилактик шок новокаин дори воситасига организмнинг реакцияси натижасида келиб чиққан бўлиши мумкинлиги қайд этилган. Ушбу дори энг кўп аллергик реакция келтириб чиқарадиган воситалардан бири ҳисобланади. Аммо анафилактик шок қандай доридан юзага келганини аниқлаш қийин бўлган.
Гувоҳ сифатида сўралган аллергологлар ва тиббий экспертлар ЛОР шифокорга тегишли хатолар аниқланмаганини билдиришган. Мудофаа вазирлиги мутасаддиси, шунингдек, ЛОР шифокорнинг амалиёти давомида беморда тана ҳарорати юқори даражага кўтарилиши ҳолати ҳеч қачон кузатилмаганини таъкидлаган.
Апелляция суди шу ва бошқа далилларни кўриб чиқиб, ЛОР шифокорни оқлашга қарор қилди. Унинг айби исботланмагани сабабли, унга нисбатан жиноий иш тугатилди. Суд хулосасида таъкидланишича, беморнинг функционал ҳолати учун жавобгар шахс анестезиолог бўлган ва ЛОР шифокорнинг бундай жараёнларга аралашиш ваколати бўлмаган.
Қолаверса, апелляция суди аввалги суд жараёнида ЛОР шифокор беморни операцияга тезроқ рози қилишга уринган деган хулосани ҳам асоссиз, деб топди. Аксинча, блогернинг ўзи операцияни тезлаштиришни сўраган, чунки у чет элга сафар қилиш учун авиачипта олгани, буни топширгани ва шифокор билан шартнома асосида бепул операция қилиш бўйича келишгани аниқланган.
Соғлиқни сақлаш вазирлиги томонидан ўтказилган текширувлар жараёнида ҳам ЛОР шифокорнинг ҳаракатларида ўлимга олиб келувчи хатоликлар қайд этилмаган. Бу ҳолат ҳам суд қарорини ўзгартиришда муҳим аҳамият касб этди.
Марҳум блогер Фарҳод Маннопов "Mittivine" тахаллуси билан ижтимоий тармоқларда фаолият юритган ва кўплаб мухлислар орттирган. У бошидан олган жароҳат туфайли бурнида муаммолар юзага келиб, операция учун клиникага мурожаат қилган. Аммо операция пайтидаги назорат етишмовчилиги ва шубҳали дори таъсири унинг ҳаётига зомин бўлган.
Суд жараёни 2023 йил сентябрда бошланган ва октябрда ёпиқ тарзда давом этган. Бугун эса, бир неча ойлик тергов ва қайта кўриб чиқишлардан сўнг, шифокор оқланди. Бу эса жамоатчиликда янги баҳс ва мулоҳазаларга сабаб бўлиши турган гап.
Бу воқеа — шифокорлар масъулияти, тиббий хато ва назоратнинг қанчалик муҳимлигини яна бир бор эслатиб турибди. Ҳар қандай жарроҳлик амалиётида инсон ҳаёти фақат битта мутахассис эмас, бутун жамоа зиммасида бўлади. Шу боис, келгусида бундай фожиалар такрорланмаслиги учун ҳар бир мутахассис ўз ишига жиддий ва масъулият билан ёндашиши шарт.
«Замин»ни Telegram’да ўқинг!
