Актриса ва инстаблогер Хонзода Қамбарова YouTube’даги “Қиёфа” подкастида шахсий ҳаётига доир кўпчиликни қизиқтирган саволларга жавоб берди. У оиласи нега бузилгани, нима учун алиментдан воз кечгани ва фарзанд тарбиясидаги қарашлари ҳақида очиқ гапирди.
Хонзоданинг айтишича, турмуши давомида у бир неча бор хиёнатга дуч келган. Ҳатто уч марта шундай ҳолатни ўз кўзи билан кўрганини таъкидлади. Шунга қарамай, у бу дардни оммага ошкор қилишни истамаган. Унинг фикрича, шахсий муаммоларни кўз-кўз қилиш ҳеч қандай натижа бермайди.
Блогер аввалги интервьюсидаги “колбасага пулимиз йўқ эди” деган гапларига ҳам изоҳ берди. У болалигида оддий ҳаёт кечирганини, мактабда бошқалардан камроқ имкониятга эга бўлгани учун ўзига нисбатан ноқулайлик ҳис қилганини айтди. Аммо бу ҳолат кейинчалик унинг энг катта мотивациясига айланган.
Аёл бахти ҳақидаги қарашлари ҳам эътиборли. Унинг таъкидлашича, баъзи ҳолларда ортиқча югур-югурдан кўра сокин ҳаёт кечириш инсонни бахтга яқинлаштиради. Бироқ у ўзини “дангаса” бўла олмайдиган инсонлар қаторига қўшди.
Фарзанд тарбиясида эса Хонзода мувозанатни сақлашга ҳаракат қилади. Қизларига барча шароитни яратиб бериш билан бирга, ортиқча эркаланишнинг олдини олишга интилган. Шу мақсадда катта қизини бир муддат давлат боғчасига ўтказганини ҳам айтиб ўтди.
Энг кўп муҳокама қилинган масалалардан бири — алимент. Хонзода болалари учун мажбурий пул олишни истамаслигини билдирди. Унингча, инсондан зўрлаб маблағ ундиришдан кўра, ихтиёрий ёрдам қимматлироқ.
Шу билан бирга, у фарзандларининг отаси билан муносабатига қарши эмас. Аксинча, болалар отаси меҳрини ҳис қилиши керак, деб ҳисоблайди. Аммо ҳозирча фақат катта қизи отаси билан кўпроқ вақт ўтказмоқда.
Хонзода ўз ҳаётидаги қийин синовларга қарамай, бугун ёлғиз оналар учун ўрнак бўлишга ҳаракат қилаётганини таъкидлади.
“Zamin”ни Telegram'да ўқинг!
