18:50 / 27.07.2021
7 411

Таниқли турк актёрини Ўзбекистонга қандай шамоллар учирди?

Таниқли турк актёрини Ўзбекистонга қандай шамоллар учирди?

«Қардошлик робитасини мустаҳкамлашга биз санъаткорлар ҳам камарбастамиз...»
«Payitaht Abdülhamid» тарихий сериалида Таҳсин пошо ролини маҳорат билан ижро этиб миллионлаб мухлислар қалбидан ўрин олган туркиялик актёр Баҳодир Енишеҳерлиўғли мамлакатимиз бўйлаб саёҳат қилди.

«Ўзбекистон заминидан ислом оламининг кўплаб улуғ алломалари етишиб чиққан. Ижодий лойиҳалар орасида таътил эълон қилинди. Фурсатдан фойдаланиб, улуғ зотлар мақбараларини зиёрат қилиш, қардошларимиз билан дийдорлашиш ва Ўзбекистон ҳавосидан баҳра олиш умидида меҳмонга келдик», – деб ёзди Баҳодир Енишеҳерлиўғли ижтимоий тармоқдаги саҳифаларида.
«Ўзбек қардошларимиз очиқ юзи, ширин сўзи билан ром этди...»
Туркиялик меҳмон Тошкент, Самарқанд, Бухородаги тарихий обидаларни зиёрат қилди. Мақбараю мадрасалар зиёрат асносида Имом Мотуридий, Абдухолиқ Ғиждувоний, Баҳоуддин Нақшбанд каби улуғ аллома ва мутасаввифлар, Амир Темур, Мирзо Улуғбек каби давлат арбоблари ҳақида эҳтиромга йўғрилган постлар ёзди.

«Азалдан ягона уммат, туғишган биродар бўлган турк ва ўзбек халқлари тарихнинг муайян даврида айро-айро яшади. Эндиликда икки қардош халқ яна ўзаро яқинлашмоқда. Зеро, эт билан тирноқни ажратиб бўлмайди», – дейди турк актёри.

Баҳодир Енишеҳерлиўғли (Bahadır Yenişehirlioğlu) нафақат актёр, ёзувчи ҳамда ҳуқуқшунослик фаолияти билан ҳам тилга тушган. Романлари учун Туркиянинг бир қатор адабий мукофотларига ҳам сазовор бўлган.
«Кўнглим, ақлу шуурим бу қадим тупроқларда қолди...»
Телесериал ва бадиий фильмларда роль ўйнаган актёрга «Payitaht Abdülhamid» фильмидаги Таҳсин пошо образи катта шуҳрат келтирди. 2017-2021 йилларда суратга олинган 154 сериядан иборат тарихий картина Туркиядан ташқари ўнлаб хорижий ўлкаларда намойиш этилди.
«Payitaht Abdülhamid»нинг бир қатор сериялари 2019 йилда «Zoʻr TV» телеканалида ўзбек тилида эфирга узатилган. Аммо кейинроқ техник сабабларга кўра намойиш тўхтатилгани маълум қилинган.

Актёр Баҳодир Енишеҳерлиўғли айни пайтда Усмонли давлати флотига раҳбарлик қилган давлат арбоби Барбарос Хайриддин Пошо (1478-1546) ҳаётига бағишланган тарихий сериалда роль ижро этмоқда.

Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)


Янгиликлар » Маданият » Таниқли турк актёрини Ўзбекистонга қандай шамоллар учирди?
[/banner_pushhouse