Ўзбекистон МТЖ бош мураббийи Тимур Кападзе Паулу Бенту ҳақида фикр билдирди — у жамоа атрофидаги вазиятни хотиржам, бирдамлик руҳида изоҳлаб, асосий эътибор Жаҳон чемпионатига тайёргарликка қаратилганини урғулади.
«Биз машғулотдамиз. Кўрдик, мураббий келганини. Келишув бўлгани ҳақида хабаримиз йўқ. Бу терма жамоа ватан жамоаси бўлгани учун энг яхшиси бўлишини тилаймиз. Хайрли бўлсин. Бу жамоани ким бошқаришидан қатъий назар Ўзбекистон терма жамоаси учун мухлислик қиламиз. Мен ҳақимда илиқ фикрлар билдирганларга миннатдорлик билдираман. Барчага раҳмат айтаман», — деди у, жамоа манфаати шахсий масалалардан устун эканини эслатиб.
Кападзе раҳбарият позициясига ҳам тўхталди: «Раҳбарият ҳам тажрибали ва ЖЧни кўрган мутахассисни олиб келиш ниятида. Ўйлайманки, бу балки яхшиликка. Биз ҳам доим ватанимиз термаси учун ёрдам берамиз». Яъни қарор қандай чиқишидан қатъий назар, штаб умумий мақсад — терма жамоа тараққиёти йўлида хизмат қилади.
«Раҳбарият қандай қарор қабул қилса, биз буни қўллаб турамиз. Биз мураббийга эмас, терма жамоага мухлислик қиламиз. Биринчи марта ЖЧга чиқдик. Вақт оз қолди ва биз бу турнирга яхши ҳолатда боришимиз лозим. Ким бўлишидан қатъий назар биз терма жамоага фойдамиз тегса, хурсанд бўламиз», — дея жамоанинг яқин истиқболдаги вазифаларини санаб ўтди мураббий.
Кападзе, шунингдек, миллий либос масъулияти ҳақида ҳам гапирди: «Терма жамоа учун ҳаракат қилиш – шараф. Биз бу либос учун муносиб бўлишга ҳаракат қиламиз». У ўз йўлини қисқача сарҳисоб қилди: «Худога шукрки, менга берилган вазифани бажардим. 34 йиллик орзуни амалга оширдик. Бундан барча хурсанд бўлди. Қолган барчаси яхшиликка бўлади. Кўряпсизлар, сўнгги йилларда юртбошимиз томонидан футболни ривожлантириш учун барча ишлар амалга оширилмоқда. Келажагимиз бундан-да яхши бўлади».
Сўзини якунлар экан, Кападзе иш натижасига қаратилган ёндашувини такрорлаб, иштиёқни баланд сақлашга чақирди: «Биз ўз устимизда ишлаймиз. Янада кучли бўлишга ҳаракат қиламиз. Ўша гап, терма жамоамиз яхши натижаларга эришишини тилаб қоламиз. Биз бундан фақатгина хурсанд бўламиз».
Қисқача айтганда, Тимур Кападзе позицияси аниқ: бирдамлик, масъулият ва ЖЧ олдидан амалий тайёргарлик. Бенту масаласи бўйича расмий қарордан қатъий назар, МТЖ олдидаги мақсадлар ўзгармайди — юқори савиядаги мусобақага муносиб ҳолатда бориш ва мухлисларга қувонч улашиш.
«Замин»ни Telegram’да ўқинг!
