Англия Премьер-лигасининг бешинчи турида чемпионлик учун курашаётган икки қудратли жамоа – "Арсенал" ва "Манчестер Сити" ўзаро тўқнаш келди. Турнинг марказий учрашуви сифатида эътироф этилган ушбу баҳсда Эрлинг Холанд 9-дақиқада ҳисобни очган бўлса, Габриэль Мартинелли ҳакам томонидан тўхталишлар учун қўшиб берилган вақтда “канонирлар”ни мағлубиятдан қутқариб қолди.
Бир очко Хосеп Гвардиолага жуда қимматга тушди. Энг катта йўқотиш кейинги пайтда "шаҳарликлар"нинг энг зўр ҳимоячисига айланиб қолган Абдуқодир Ҳусановнинг сафдан чиққани бўлди. Шикастланган легионерни мураббийлар штаби танаффусда захирага олди. Ҳусановнинг ўйиндан чиқиши манчестерликлар ҳимоя чизиғини сезиларли даражада заифлаштириб қўйди.
Ҳар ҳолда энг оғриқли нуқта – ўнг қанот ҳимоясини ишончли қўрғонга айлантира олган ўзбек футболчиси ҳимоя марказидагиларга ҳам ёрдам бериб келаётган эди.
Райан Айт-Нурининг жиддий жароҳатидан кейин ҳимоянинг чап қанотида унинг йўқлигини билдирмай келаётган Нико О’Райли ҳамда жамоа тўпурари Эрлинг Холанд ҳам "Арсенал"га қарши тўқнашувда айрим муаммоларга дуч келди.
Нуфузли манбалардан бири – thesportsbank.net сайти "Манчестер Сити"даги вазиятга ойдинлик киритди. Ушбу манба эксперти Пол Бэнкснинг "шаҳарликлар" жамоасидаги ҳолат ҳақида тўплаган маълумотларини футбол ишқибозлари эътиборига ҳавола этамиз:
— "Манчестер Сити" тўпурари Эрлинг Холанд чоршанба куни тунда Англия лигаси кубоги учинчи босқичи доирасида "Хаддерсфилд Таун" жамоасига қарши учрашувни ўтказиб юбориши мумкин. Бунга иккита сабаб бўлди.
Биринчидан, "шаҳарликлар" бу мусобақада қуйи лига вакилига қарши саф тортади ва бу бир неча куч ичида кетма-кет учта ўйинда қатнашган норвегиялик форвард тўлиқ саломат бўлган тақдирда ҳам унга ҳордиқ чиқариши учун дам берилиши керак.
Иккинчидан, Холанднинг белида оғриқ пайдо бўлгани учун 25 ёшли футболчи "Арсенал" билан бўлган ўйинни охирига етказа олмади. Шу боис, бўлажак баҳсда Холандни кўрмаслигимиз ҳақиқатга яқин.
"Арсенал" билан кечган ўйинда шикастланган икки қанот ҳимоячилари – Нико О’Райли ҳамда Абдуқодир Ҳусанов ҳам "Хаддерсфилд Таун"га қарши бўладиган баҳсда майдонга тушмайди, - деб ёзди Пол Бэнкс.
Эслатиб ўтамиз, бўлажак учрашувда Ҳусанов, Холанд ва О’Райлидан ташқари жароҳати жиддий бўлган беш футболчи – Райан Шерки, Умар Мармуш, Райан Айт-Нури, Матео Ковачич ва Кэлвин Филлипс ҳам иштирок этмайди.
24 сентябрга белгиланган Лига кубоги учинчи босқичи доирасидаги учрашувга "Хаддерсфилд Таун" жамоаси мезбонлик қилади.
«Замин»ни Telegram’да ўқинг!
