ФИФА президенти Жанни Инфантино АҚШ раҳбари Доналд Трамп ташкилотнинг янги таъсис этилган “Тинчлик мукофоти”ни олиши мумкинлиги ҳақидаги саволга ўз муносабатини билдирди.
Инфантинонинг таъкидлашича, бу ҳақдаги аниқ жавоб 5 декабр куни маълум бўлади. Шу билан бирга, у Трамп билан шахсий муносабатлари ҳақида сўз юритар экан, АҚШ президентини катта ҳурмат билан тилга олди.
— Ҳозирча барча саволларга жавоб беришга шошилмайман, лекин айтишим мумкинки, мен жуда омадли инсонман. Доналд билан муносабатларим жуда яхши, у менинг ҳақиқий дўстим. Жаҳон чемпионати билан боғлиқ ишларимизда у бизга катта ёрдам берди. Унинг қуввати, ишга бўлган муносабати ва кучли характери менга ёқади, — деди Инфантино журналистлар билан суҳбатда.
ФИФА президентининг фикрича, Трампни бошқалардан ажратиб турувчи жиҳат — у ўз фикрини яширмайди, гапириши керак бўлган пайтда оғир сўзлардан ҳам қочмайди.
— Доналд ҳар доим гапириши керак бўлган нарсани айтади. Бошқалар фақат ўйлайди, у эса айтади. Шунинг учун у шунчалик муваффақиятли. У ишонч билан ҳаракат қилади ва айтганини амалга оширади, — дея қўшимча қилди Инфантино.
Маълумот учун, ФИФА яқинда “Тинчлик мукофоти” деб номланган янги халқаро мукофотни таъсис этган. Ушбу соврин спорт орқали тинчлик, бирдамлик ва инсоний қадриятларни илгари суришга катта ҳисса қўшган шахсларга берилади.
ФИФАдаги манбаларга кўра, Трампнинг 2026 йилги Жаҳон чемпионатига кўрсатган ташаббуслари ва футбол инфратузилмасини ривожлантиришдаги қўллаб-қувватлови уни номзодлар қаторига киритишга сабаб бўлган.
Шундай қилиб, 5 декабрь куни жаҳон футбол жамоатчилиги Доналд Трампнинг “ФИФА Тинчлик мукофоти”ни қўлга киритиши мумкинлигига ойдинлик киради.
