Франциянинг машҳур «Олимпик Марсель» клуби ўз брендини янгилаш мақсадида логотип дизайнини ўзгартиришга қарор қилди. Бироқ ушбу ташаббус кутилганидек илиқ қабул қилинмади ва мухлислар томонидан кескин танқидларга сабаб бўлди.
Маълум қилинишича, янги логотип устида ишлаш жараёни анча жиддий ва пухта ёндашув асосида амалга оширилган. Лойиҳа учун 2025 йил май ойида Франция Миллий саноат институтига расмий мурожаат йўлланган. Бир йиллик меҳнатдан сўнг, «Арт Деко» услубидаги янги вариант ишлаб чиқилди ва унинг расмий тақдимоти 8 апрелга режалаштирилган эди.
Бироқ, тақдимотга улгурмай туриб, логотип ижтимоий тармоқларда тарқалиб кетди ва мухлислар томонидан қаттиқ эътирозларга учради. Айниқса, дизайннинг замонавий услуби кўпчиликка маъқул келмади.
Қизиғи шундаки, ребрендинг устида ишлаган агентлик янги логотипни яратишда «Пежо» ва «Ситроен» каби машҳур автомобил брендларидан илҳомланганини таъкидлаган. Бу эса мухлислар норозилигини янада кучайтирди.
«Биз футбол клубимиз, автомобиль дилери эмасмиз», — деган фикрлар ижтимоий тармоқларда кенг тарқалди. Кўплаб мухлислар клубнинг олтин даврларини эслаб, айниқса Бернар Тапи раҳбарлигида бўлган йиллардаги анъанавий логотипни қайтаришни талаб қилмоқда.
Шу тариқа, «Марсель» раҳбарияти учун бу ребрендинг катта сабоқ бўлиши мумкин. Чунки футболда нафақат натижа, балки анъана ва рамзлар ҳам мухлислар учун жуда муҳим аҳамиятга эга.
“Zamin”ни Telegram'да ўқинг!
