Англия Премьер-лигасининг 33-тури доирасидаги марказий тўқнашувда "Манчестер Сити" ўз майдонида пешқадам "Арсенал"ни 2:1 ҳисобида мағлуб этиб, чемпионлик пойгасига яна қайтганини намоён қилди. Ушбу баҳс нафақат натижа, балки ҳакамлик қарорлари билан ҳам кенг муҳокамаларга сабаб бўлди.
Учрашувда тўлиқ 90 дақиқа ҳаракат қилган Абдуқодир Ҳусанов жамоасининг ҳимоя чизиғидаги энг ишончли футболчилардан бири сифатида кўзга ташланди. У бир неча бор хавфли вазиятларни бартараф этиб, рақиб ҳужумларини самарали тўхтатди.
Бироқ ўйиннинг айрим эпизодлари катта баҳсларга сабаб бўлди. Бош ҳакам Энтони Тейлорнинг икки қарорини мутахассислар алоҳида таҳлил қилди. Биринчи ҳолатда Ҳусанов яккама-якка чиқиб кетаётган Кай Хаверцни тўхтатган вазиятда жарима ва эҳтимолий қизил карточка масаласи кўтарилди. Иккинчи эпизодда эса ўйин сўнгида Габриэль Магальяэнс ва Эрлинг Холанд ўртасидаги тўқнашув диққат марказида бўлди.
Ҳар икки ҳолатда ҳам ҳакам ўйинни қаттиқ жазоларсиз давом эттиришни маъқул кўрди. Аммо бу қарорлар кўпчилик томонидан ортиқча юмшоқлик сифатида баҳоланди.
Собиқ ҳакам Кит Хакеттнинг фикрича, Ҳусановнинг эпизодида жарима белгиланмагани футболчи учун омад бўлган. У шундай деди:
— Агар бу вазиятда қоидабузарлик қайд этилганида, менимча, очиқ гол имконияти йўқ қилинган деб баҳоланар ва бу тўғридан-тўғри қизил карточкага олиб келар эди. Қайта кўриб чиққанимдан кейин ҳам шу хулосага келдим — Ҳусанов майдонда қолгани унинг омади, — дея таъкидлади Хакетт.
Иккинчи эпизод бўйича эса яна бир собиқ ҳакам Дермот Галлахер бошқача фикр билдирди. Унинг таъкидлашича, Габриэль ва Холанд ўртасидаги вазиятда икки футболчига сариқ карточка кўрсатилиши адолатли қарор бўлган:
— Бу вазият хавфли кўриниши мумкин, лекин диққат билан қаралса, ҳимоячи рақибига аниқ зарба бермаган. Иккала футболчи ҳам ўйин давомида анча агрессив ҳаракат қилди ва ҳакам вазиятни тўғри баҳолади, — деди Галлахер.
Якуний таҳлилларга кўра, кўплаб мутахассислар фикрича, ушбу баҳсда "Арсенал" айрим ҳакамлик қарорларидан кўпроқ зарар кўрган. Айниқса, Ҳусановнинг майдонда қолиши “Сити” ҳимоясига катта ёрдам бериб, рақибнинг ҳужумларини чеклашда муҳим омил бўлган.
Қисқаси, бу ўйин фақат ҳисоб билан эмас, балки баҳсли қарорлар билан ҳам эсда қоладиган бўлди. Чемпионлик пойгаси қизияпти — ва ҳар бир детал энди олтинга тенг.
“Zamin”ни Telegram'да ўқинг!
