Испания чемпиони Барселона Англиянинг Нюкасл клуби вингери Антонй Гордон трансферини расман эълон қилди. Каталонияликлар ушбу трансфер пойгасида Бавария жамоасини ортда қолдиришга муваффақ бўлишди. 25 ёшли футболчи кўк-анорранглилар билан беш йиллик шартнома имзолади. Бу ҳақда Goal.com хабар беради.
Келишувнинг умумий қиймати 80 миллион еврони ташкил этади. Барселона дастлаб 70 миллион евро тўлайди, қолган 10 миллион евро эса турли бонуслар кўринишида тақдим этилади. Футболчи пайшанба куни тиббий кўрикдан ўтиш учун Барселона шаҳрига етиб келди ва 2031-йилгача мўлжалланган шартномага қўл қўйди.
Бир неча кун аввал Антонй Гордон Мюнхеннинг Бавария клубига ўтиши ва у ерда Гарри Кейн билан бирга тўп суриши кутилаётган эди. Бироқ Барселона спорт директори Деко Англияга ташриф буюриб, музокаралар жараёнини ўзгартириб юборди. Mundo Deportivo нашрининг хабар беришича, жамоада Ламине Ямал каби юлдузлар борлиги ва Ханси Флик лойиҳаси футболчининг қарорига ижобий таъсир кўрсатган.
Шартнома шартларига кўра, агар Гордон ўйинларнинг 60 фоизида иштирок этса, Нюкасл ҳар мавсум учун 1 миллион евродан қўшимча маблағ олади. Шунингдек, футболчининг собиқ жамоаси Эвертон ҳам ушбу трансфердан 15 фоизлик улушга эга бўлади. Ушбу трансфер Нюкасл учун катта фойда келтириши билан бирга, клубга янги футболчилар сотиб олиш учун молиявий имконият яратади.
Трансфернинг тезда ҳал этилиши Антонй Гордон учун Жаҳон чемпионати олдидан Англия терма жамоаси йиғинига ўз вақтида қўшилиш имконини беради. Нюкасл эса халқаро турнирлар вақтида юзага келиши мумкин бўлган жароҳатлар хавфидан қутулиб, ўз трансфер режаларини эрта амалга оширишни бошлади.
“Zamin”ни Telegram'да ўқинг!
