Шомуродов: «Асосий мақсадимиз — халқимизни ғалаба билан хурсанд қилиш»

Ўзбекистон миллий жамоаси сардори Элдор Шомуродов 2026 йилги жаҳон чемпионати гуруҳ босқичининг 3-туридан ўрин олган Конго ДРга қарши муҳим учрашув олдидан ўз фикрларини билдирди.

Ҳужумчининг таъкидлашича, жамоанинг асосий мақсади — Ўзбекистон халқини илк ғалаба билан қувонтириш.

«Асосий мақсадимиз — бизни қўллаб-қувватлаётган халқимизни хурсанд қилиш. Жаҳон чемпионатидаги биринчи голимизни урдик, энди вазифамиз илк ғалабани қўлга киритиш», — деди Шомуродов.

Сардор жамоа фақат ҳужум ҳақида ўйлаб, ҳимояни эътибордан четда қолдирмаслигини ҳам таъкидлади.

«Гол уришга интилиб, орқа чизиқни унутмоқчи эмасмиз. Тартибли ўйин кўрсатишимиз ва биринчи навбатда ғалабага эришишимиз муҳим», — дея қўшимча қилди у.

Шомуродов мухлисларнинг қўллаб-қувватловини жамоа тўлиқ ҳис қилаётганини айтди.

«Нафақат стадиондаги, балки Ўзбекистондаги ишқибозларимизнинг ҳам қўллаб-қувватлашини ҳис қилдик. Уларга миннатдорчилик билдирамиз ва навбатдаги ўйинда хурсанд қилишга ҳаракат қиламиз», — дея футболчининг сўзларини келтирди ЎФА матбуот хизмати.

Ўзбекистон ва Конго ДР ўртасидаги учрашув 28 июнь куни Тошкент вақти билан соат 04:30 да бошланади. Африка вакили ҳисобида 1 очко бор, Фабио Каннаваро бошчилигидаги Ўзбекистон эса ҳозирча очко жамғара олмаган.